काठमाडौं । काठमाडौं महानगरपालिकाले विद्यार्थीलाई चाडपर्वका नाममा विद्यालय पोसाकबाहेक अन्य पोसाक खरिद गर्न बाध्य नपार्न विद्यालयहरुलाई आग्रह गरेको छ।
काठमाडौं महानगर क्षेत्रमा रहेका सबै विद्यालयलाई परिपत्र जारी गर्दै महानगरपालिकाले यस्तो आग्रह गरेको हो। महानगरभित्र सञ्चालित केही विद्यालयले विभिन्न चाडपर्वका नाम विद्यार्थीलाई नियमित विद्यालय पोसाकभन्दा फरक पोसाक किन्न बाध्य पारेको भन्ने गुनासो प्राप्त भएको भन्दै महानगरपालिकाले तोकिएको विद्यालय पोसाकबाहेक अन्य पोसाक किन्न विद्यार्थीलाई बाध्य नगर्न विद्यालयहरुलाई आग्रह गरेको छ।
कोही कसैले यो परिपत्रविपरीत कार्य गरेको पाइएमा काठमाडौं महानगरपालिका शिक्षा ऐन, २०७५ (संशोधनसहित) र अन्य प्रचलित कानुनबमोजिम दण्डसजाय हुने महानगरपालिकाले चेतावनी दिएको छ।
