काठमाडौं । शेयर बजारको गिरावटले आज सोमबार पनि निरन्तरता पाएको छ।
नेप्से परिसूचक आज ३.४२ अंकले घटेर १८४७.८१ को विन्दुमा बन्द भएको छ। बजार घटे पनि आज कारोबार भने १ अर्ब रुपैयाँ माथिको भएको छ। कारोबार हिजोको तुलनामा बढेको हो।
आज नेप्सेमा सूचीकृतमध्ये २९२ कम्पनीका ३८ लाख ९६ हजार २८७ कित्ता शेयर १ अर्ब १९ करोड ७२ लाख ५७ हजार ८९४.६९ रुपैयाँमा किनबेच भएका छन्।
यो दिन सोनापुर मिनरल्सको सर्वाधिक कारोबार भएको छ। यो कम्पनीको ७ करोड ४६ लाख रुपैयाँ बढीको शेयर किनबेच भएको छ। हिमालयन डिस्टिलरीको पनि ७ करोड ७ लाख रुपैयाँबराबरको कारोबार भएको छ।
सामान्य अंकले घटेको बजारमा आज १२२ कम्पनीको शेयरमूल्य बढ्दा १०९ कम्पनीको घटेको छ। यो दिन समाज लघुवित्तका शेयरधनीहरु मालामाल भए। यो लघुवित्तको शेयरमूल्य ८ प्रतिशत बढीले उकालो लागेको छ। आज एनआरएन इन्फ्रास्ट्रक्चर र माउन्टेन इनर्जीका शेयरधनीहरुले सर्वाधिक गुमाए। यी दुवै कम्पनीको शेयरमूल्य ९.९९ प्रतिशतले घटेको छ।
