कैलाली लम्किचुहाका रत्ना रिमाल खनाल जागिरे अनि व्यवसायी पनि हुन् । घरव्यवहारसँगै जागिरे जीवन त्यसमाथि व्यवसाय सम्हाल्नुपर्दा उनको दैनिकि निक्कै व्यस्त छ । कामप्रतिको मेहेनत र लगावकै कारण जीवनमा सफलताले पछ्याइरहेको छ । पछिल्लो समय उनको व्यस्त दैनिकिलाई थप प्रगाढ रुपमा व्यस्त बनाउन बीमा अभिकर्ता थपिएको छ । जुन पेशा प्रति उनी दत्तचित्त भएर लागि परेकी छिन् भने उनलाई यो पेशााले सफलता पनि दिएको छ ।
रत्नाले सुरुवाती समयमा बीमा पेशाप्रति खासै चासो देखाइनन् । उनले दुई वर्षअघि आइएमई लाइफ इन्स्योरेन्स कम्पनीको लम्किचुहा शाखामा आफ्नै बीमा गरेकी थिइन् । भैपरि आउने समस्याबाट बच्न, निकट भविष्यमा हुन सक्ने आर्थिक अभावलाई परिपूर्ति गर्न सकिन्छ भन्ने सोचका साथ १० लाख रुपैयाँको बीमा गराएकी थिइन् । सोही समय उनलाई अभिकर्ता बन्न सुझाएपछि आइएमई लाइफबाट अभिकर्ताको लाइसेन्स लिइन् । तर व्यस्त भएकोले अभिकर्ता बनेर काम गर्ने मनाशय भने थिएन । उनको सोचाइमा बीमा बचतको अर्काे रुप थियो । आफू खुशी बचत गर्दा खासै ध्यान नजाने तर फोर्सफुल्ली बचत गर्दा भने बचत गर्नुपर्छ है भन्ने मानसिकता हुने भएकोले पनि उनी बीमा गर्ने सोचमा पुगेकी थिइन् ।
अभिकर्ता लाइसेन्स लिएको १ वर्षसम्म उनीले खासै चासो देखाइनन् । जागिर छँदैछ, व्यवसाय पनि छँदैछ किन यतातिर अल्झिनु भन्ने सोचले उनी अरु व्यक्ति समक्ष बीमा प्रस्ताव लिएर गइनन् । सोही समयवधिमा उनले बीमा बारे केहि अध्ययन र बुझ्ने मौका भने पाइन् । बीमा गरेका छिमेकीहरुले एक दुई किस्ता तिरेपनि दुर्घटनामा पर्दा भुक्तानी पाएको, क्षति रिकभर भएको उनले प्रत्यक्ष रुपमा देखिन् । जब मानव जीवनमा बीमा अपरिहार्य रहेछ भन्ने कुराको ज्ञान भयो, तव उनले अभिकर्ता लाइसेन्सलाई प्रयोगमा ल्याउने सोच बनाइन् ।
त्यसपश्चात उनले आफ्नै आफन्तलाई बीमाको महत्व र जीवनमा यसकोे भूमिकाबारे जानकारी दिन थालिन् । उनको कुरा सुनिसकेपछि उनका आफन्त बीमा गर्न तयार भए । उनले हाल आफ्नै घरपरिवार र आफन्तको बीमा गराइसकेकी छिन् । व्यस्त समयबाट निस्केको केहि समयलाई खेरा नफाली उनी बीमा बारे जानकारी दिन तयार हुन्छिन् । आफूले जानेको बुझेको र थाहा भएको कुरा निर्धक्कका साथ सबैलाई सुनाउँछिन् । सानो रकमको बीमामा उनी आफै अघि बढ्छिन् । तर ठूलो रकमको बीमा गर्नुपरेका भने अफिसको सरहरुसँग भेटाएर कुरा गराउँछिन् । विगत एक वर्षदेखि सक्रिय रुपमा लागेकी रत्नाको अनुभवमा बाहिरको भन्दा आफ्नै आफन्तले बढि विश्वास गर्ने गरेको छ ।
विगत १ वर्षदेखि अभिकर्ता पेशामा लागि परेकी रत्नालाई जागिरभन्दा अभिकर्ता पेशा नै ठिक लाग्न थालेको छ । एकातिर बचत गर्ने बानि बस्ने अर्कातिर भवितव्य भइपरि आउने समस्यालाई समाधान गर्न सक्ने भएकोले पनि उनलाई यो पेशा ठिक लागेको हो । यसका साथै समाजमा रहेका व्यक्तिहरुलाई समेत आर्थिक संकटबाट बच्ने उपाय बाँड्न पाउँने भएकोले पनि यो पेशा ठिक लागेको हो ।
रत्नाले एक वर्षको अवधिमा करिब ७० लाख बराबरको बीमा गराइसकेकी छिन् । जसकारण २०७८,०७९ को आइएमई लाइफ लम्किचुह शाखाबाट एफबीआई तर्फको व्यक्तिगत संकलनमा पहिलो स्थान हाँसिल गर्न सफल भएकी थिइन् । यो सफलताले उनलाई थप प्रोत्साहा मिलेको उनी बताउँछिन् ।
यो वर्ष उनको एउटै मात्र लक्ष्य रहेको छ । आउँदो पुष महिनासम्ममा जसरी पनि एमडीआरटी बन्ने टार्गेट लिएकी छिन् उनले । आफ्नो साथीभाई र चिनजान राम्रो भएकोले पनि यो लक्ष्य हाँसिल गर्न सफल हुन्छु भन्ने कुरामा उनी विश्वस्त छिन् । सफलतासँगै केहि अप्ठेरो भने पक्कै छ । बीमाको बारेमा अझै धेरै जनालाई राम्रो ज्ञान छैन । यसले गर्दा कन्भिन्स गर्न गाह्रो हुने गरेको उनी बताउँछिन् ।
अभिकर्ता पेशा नामसँगै पैसा पनि जोडिएर आउने भएकोले यो पेशामा आवद्ध हुन चाहनेका लागि उनी आवद्ध हुन सुझाउँछिन् । पूर्णकालिन समय नदिएपनि आवश्यक आम्दानी गर्न सक्ने हुँदा महिलाहरुका लागि यो पेशा उपयुक्त रहेको भएको उनको भनाई छ ।
