काठमाडौं । छ्याङदी हाइड्रोपावरले लिलामीमा विक्री गरेको शेयरको बोलपत्र आज बिहिबार खोलिने भएको छ । बिक्रि प्रबन्धक ग्लोबल आइएमई क्यापिटलले आज बिहिबार दिउँसो ३ बजे नक्साल कार्यालयमा बोलपत्र खोलिने जनाएको छ ।
कम्पनीले चैत्र १ गतेदेखि ९ गतेसम्म हकप्रदमा अवितरित ५९ हजार ८ सय २७ कित्ता शेयर लिलाम बढाबढ मार्फत बिक्रि गरेको थियो। आवेदन दिदा न्युनतम १ सय कित्ताको लागि आवेदन दिनु पर्ने र अधिकतम सबै कित्ताको लागि आवेदन दिन सकिने ब्यबस्था थियो । शेयरको न्युनतम मूल्य प्रति कित्ता १०० रुपैयाँ तोकिएकोले सो भन्दा बढी रकम कबुल गरि आवेदन दिनु पर्ने ब्यबस्था गरिएको थियो ।
सबैभन्दा बढी रकम कबुल गर्नेलाई शेयर प्रदान गरिने छ । यदि सबैभन्दा बढी रकम कबुल गर्नेलाई शेयर प्रदान गरिएपछि शेयर बाँकि रहेमा त्यसपछिको बढी मूल्य कबुल गर्नेलाई शेयर प्रदान गरिने छ । शेयर बाँकि रहँदासम्म यहि प्रक्रियाबाट शेयर बाँडफाँड हुने छ ।
छ्याङदी हाइड्रोले माघ ११ गतेदेखि फागुन २ गतेसम्म १०ः३ को अनुपातमा ३० प्रतिशतले हुन आउने ८ करोड ९३ लाख २ हजार ५ सय रुपैयाँ बराबरको ८ लाख ९३ हजार २५ कित्ता हकप्रद शेयर निष्काशन गरेको हो । हकप्रद निष्काशन गर्दा आवेदन नपरेको शेयर लिलामी प्रक्रियामार्फत विक्री गरेको हो ।
कम्पनीले हकप्रद प्रयोजनको लागि पुस २१ गते बुक क्लोज गर्ने निर्णय गरेकोले पुस २० गतेसम्म कायम शेयरधनीले मात्र हकप्रदमा आवेदन दिन सक्ने ब्यबस्था थियो।
