काठमाडौं । ग्रीन भेन्चर्स लिमिटेडले निष्काशन गरेको आईपीओमा २५ लाख ३९ हजार २९० कित्ताका लागि आवेदन परेको छ । सिडिएस क्लियरिङका अनुसार सोमवार साँझ ५ बजेसम्ममा ५ हजार ३३१ जनाबाट रू। २५ करोड ३९ लाख २९ हजार बराबरको आवेदन परेको हो ।
कम्पनीले फागुन २ गतेदेखि ३१ लाख २५ हजार कित्ता आईपीओ विक्री खुला गरेको हो । कम्पनीले आयोजना प्रभावित क्षेत्र अर्थात् ओखलढुंगाको खिजिदेम्बा गाउँपालिका १, २ र ३, लिखु गाउँपालिका ९, रामेछापको लिखु तामाकोशी गाउँपालिका १ र २ र उमाकुण्ड गाउँपालिका ७ का बासिन्दाहरुका लागि उक्त कित्ता आईपीओ विक्री खुला गरेकोे हो ।
आईपीओ विक्री बन्द हुने छिटो अवधि फागुन १६ गते अर्थात् आजसम्म रहेको भएपनि सम्पूर्ण शेयर विक्री भइनसकेकाले आवेदकले फागुन २३ गतेसम्म आवेदन दिन सक्नेछन् ।
कम्पनीको आईपीओलाई केयर रेटिङ नेपालले समयमै वित्तीय दायित्व पूरा गर्ने मध्यम क्षमता रहेको संकेत गर्ने केयर एनपी डबल बी आईएस रेटिङ प्रदान गरेको छ ।
आईपीओ खरीदका लागि लक्ष्मी बैंकको मन्थली शाखा, नेपाल इन्भेष्टमेन्ट बैंकको धोबिबजार, आयोजना स्थल र मेगा बैंकको खिजिदेम्बा तथा मन्थली शाखा कार्यालयबाट आवेदन दिन सक्नेछन् ।
यसका साथै सी–आस्बा सेवामा सहभागी सम्पूर्ण बैंक तथा वित्तीय संस्था र तिनका शाखा कार्यालयबाट आवेदन दिन सकिने व्यवस्था छ । यो आईपीआकोे विक्री प्रबन्धकमा लक्ष्मी क्यापिटल मार्केट लिमिटेड रहेको छ । स्थानीयले न्यूनतम १० कित्तादेखि अधिकतममा ५० हजार कित्तासम्म माग गर्दै आवेदन दिन सक्नेछन् ।
