काठमाडौं । युनाइटेड इदि-मर्दी एण्ड आर.वि. हाइड्रोपावरले सत प्रतिशत हकप्रद शेयर निष्काशन गर्ने हल्लाले लगातार तीन दिनदेखि सर्किट लागिरहेको छ । गत बिहीबार कम्पनीको शेयर मूल्य ६३६ रुपैयाँ थियो । लगातार तीन पटक सर्किट लाग्दा आज मंगलबार कम्पनीको शेयर मूल्य ९१८ रुपैयाँ पुगिसकेको छ ।
यस अवधिमा हकप्रद शेयर निष्काशनको सूचना पाउनेले राम्रो आम्दानी गर्न भ्याएका छन् । पछिल्लो समय जलविद्युत कम्पनीहरु पहिला सूचना चुहाउने केहि समय बढाएर राम्रो नाफा गरेर बाहिरिने ट्रेण्ड बढेको छ ।
कम्पनीले २०७७ मंसिरमा सर्वसाधारणका लागि प्राथमिक शेयर जारी गरेको थियो । कम्पनीले मर्दी खोलामा ७ मेगावाट क्षमताको जलविद्युत आयोजना निर्माण गरेको छ । उक्त आयोजनाको निर्माण कार्य सम्पन्न भएर व्यवसायिक उत्पादन पनि सुरु भइसकेकोले कम्पनीको प्रतिशेयर आम्दानी २७ रुपैयाँ देखिन्छ ।
एकातर्फ वित्तीय विवरण राम्रो रहेको छ भने अर्को तर्फ कम्पनीले सत प्रतिशत हकप्रद शेयर निष्काशन गर्ने हल्लाले शेयर मूल्यमा लगातार सुधार भइरहेको छ ।
