काठमाडौं । मंगलबार नेप्से सूचक १९.२६ अंकले सुधार भएर २८९१.३० अंकमा रोकिएको छ । जलविद्युत कम्पनीको शेयर मूल्यमा आएको उछालले नेप्से सूचक तथा कारोबार रकम दुबै बढेको हो । प्रधानमन्त्री शेर बहादुर देउवाले एमसिसी पारित गर्ने अभिव्यक्ति दिए सँगै जलविद्युत कम्पनीको शेयर मूल्यमा उछाल आएको हो ।
एमसिसीका साथै सरकारले स्थानीय चुनावको घोषणा गर्दैछ । आइतबार स्थानीय चुनाव हुने समाचारले १०५ अंकले नेप्से सूचक सुधार भएको थियो । तर सोमबार एमसिसीका कारण स्थानीय तहको चुनावमा असर पार्न सक्ने विश्लेषण सँगै सूचक घट्यो ।
तर प्रधानमन्त्री देउवाले एमसिसी पारित गर्ने अडान लिए पछि भने आज जलविद्युत कम्पनीको शेयरमा उछाल आएको हो । जलविद्युत कम्पनीको शेयरमा उछाल आए पनि व्यापार, जीवन बीमा, उत्पादन तथा प्रशोधन र अन्य सूचकमा भने गिरावट आएको छ ।
मंगलबार जलविद्युत कम्पनीको सूचक ३.२२ प्रतिशतले सुधार भएको छ । सर्वाधिक धेरै मूल्य बढ्ने १० कम्पनीमा ८ वटा जलविद्युत कम्पनी परेका छन् । विन नेपाल लघुवित्त र बुद्धभुमी हाइड्रोपावरको शेयर मूल्यमा सकारात्मक सर्किट लागेको छ । सर्वाधिक धेरै कारोबार हुने कम्पनीमा पनि जलविद्युत कम्पनी नै छन् । आज सबैभन्दा धेरै नेशनल हाइड्रोपावरको ३९ करोड एक लाख रुपैयाँको कारोबार भएको छ । नेप्से सूचक १९.२६ अंकले सुधार हुँदा कारोबार रकम भने ६ अर्ब ५७ करोड रुपैयाँ भएको छ । आज १४८ वटा कम्पनीको शेयर मूल्यमा सुधार हुँदा ३६ वटाको भने घटेको छ ।
