काठमाडौं । निजी क्षेत्रबाट प्रवद्र्धित पुनर्बीमा कम्पनी हिमालयन रिइन्स्योरेन्सको वेभसाइटमा सुरक्षा चुनौती देखिएको छ । गत साउनबाट सार्वजनिक गरिएको कम्पनीको वेभसाइटमा सेक्याेर्ड सकेट लेयर(एसएसएल) नभएकाले आम प्रयोगकर्ताले कम्पनीको वेबसाइटमा पहुँच पाउन सकेका छैनन् ।
हिमालयन रिइन्स्योरेन्सको वेभसाइट डब्लुडब्लुडब्लु डट हिमालयन रि डट कम (www.himalayanre.com) मा एचटिचिपिएस छैन । यही कारणले कम्पनीको वेभसाइट खोल्ने प्रयास गर्दा भिजिटरलाई तथ्यांक र व्यक्तिगत विवरणको गोप्यताको हिसाबले वेबसाइट असुरक्षित भएकाले नखोल्न कम्प्युटर वा मोबाइलको एण्टीभाइरसले चेतावनी दिइ रहेको हुन्छ ।
कुनै पनि वेभसाइट खोल्दा वेभसाइटको नामसँगै देखिन ताल्चाको संकेतले वेभसाइटमा क्लिक गर्ने वा शयर गर्ने र वेभसाइट संचालकबीच आदान प्रदान हुने सूचना, तथ्यांकमा तेश्रो पक्षको अनधिकृत पहुँच नहुने प्रत्याभूती दिन्छ ।
एसएसएलको प्रयोगले वेभसाइट संचालक र वेभसाइट भिजिटरबीच आदान प्रदान हुने सूचना तथा तथ्यांकहरु संकेतमा परिणत गरिदिने भएकाले उद्गम बिन्दुबाट गन्तव्यसम्म नपुग्दासम्म कसैले हात पारि हाले पनि त्यसलाई पढ्न सक्दैन ।
