स्व–इच्छाले काम गर्न सकिने हुँदा बीमा अभिकर्ता पेशा त्यसमाथि पनि महिलाहरुको लागि एकदम स्वतन्त्र पेशा हो । बीमा अभिकर्ता पेशामा समय सीमाले बाध्दैन् । नत अरु पेशामा जस्तो कसैको सिफारिस नै चाहिन्छ । बीमा अभिकर्ता पेशामा पैसा पनि छ साथै इज्जत पनि । मेरो जीवनको कुरा गर्ने हो भने, म सामान्य व्यवसायमा रुमलिएको मान्छे हुँ । सिमित व्यक्तिसँगको परिचय, आम्दानी र खर्चको बन्धनमा रहेर कतिपय रहर र खुशीलाई नै मारेर बसेको थिए । अभिकर्ता पेशामा प्रवेश गरेपछि मेरो जीवनमा धेरै परिवर्तन आए । अभिकर्ता पेशा मै जोडिए पछि पब्लिक रिलेशन बढ्यो, आम्दानीको क्षेत्र फराकिलो भयो । जुनसुकै तह र तप्काका मानिसहरुसँग पनि जनसम्पर्क बढ्यो । मेरो जीवनशैलीमा कायापलट नै भयो ।
अभिकर्ता पेशा सामाजिक पुण्यको पेशा हो । बीमा अभिकर्ता पेशा स्वतन्त्र पेशा हो । महिलालाई पुरुषको तुलनामा थोरै मात्र स्थान दिने नेपाली समाजमा महिलाको काम देखेर खुट्टा तान्ने प्रवृति आज पनि कायमै छ । पहिला पहिला महिलालाई घर बाहिरको काम गर्न धेरै असहज थियो । त्यही माथि बीमा अभिकर्ता भएर अहिलेको समयमा काम गर्न सहज छैन । कतिपय अवस्थामा महिला भएकैले काम गर्न गाह्रो हुन्छ ।
आजभोलि समाजमा काम गर्न गाह्रो र सजिलो भन्ने कुरा चाँही मानिसको सोचाइ र विचारमा भर पर्छ । त्यही माथि हाम्रो समाजमा बीमा अभिकर्ता भन्ने पेशालाई धेरै तल झार्ने प्रविधि पनि नभएको हैन् । त्यो प्रवृत्तिमा अलि फरकपन पाइएको छ ।
वास्तवमा महिलाहरु शिक्षित भई सफलताको उचाइमा पुगेपनि घरको चुलो चौका र घरधन्दाले छोडेको हुँदैन् । साझ, विहान, काम, परिवारको दायित्व र घर व्यवहार सम्हाल्ने जिम्मेवारी त्यस माथि पनि आर्थिक स्रोत पनि जुटाउनुपर्ने बाध्यता जसले गर्दा शिक्षित महिलालाई आफ्नो जागिर गर्न गाह्रो भएको छ । तर यो अभिकर्ता पेशा यस्तो पेशा हो जहाँ समय तोकिएको हुदैन् आफ्नो घर परिवार सबैलाई समय दिएर आफुले आफ्नो कामको लागि थोरै समय दियो भने पनि केही आम्दानी गर्न सकिन्छ । यस अभिकर्ता पेशामा आफुले गरी रहेको कामलाई सामाजिक र शारीरिक आक्षेप नआउने तरिकाले स्वतन्त्र भएर काम गर्यो भने अवश्य सफल भईन्छ ।
बीमा अभिकर्ता पेशा पुरुषको तुलनामा महिलाहरुको लागि निकै नै सहज पेशा हो । महिलाहरुले घर परिवार वालबच्चा आफ्नो दायित्व लगायतका हरेक जिम्मेवारी पुरा गर्नु पर्छ । अन्य पेशामा उनिहरुलाई त्यति सहज हुँदैन । तोकिएको समय सिमा भित्र रहेर काम गर्नु आफैमा चुनौतिपुर्ण छ । त्यसकारण अभिकर्ता पेशामा आफ्नो समयले भ्याएसम्म स्वतन्त्र भएर काम गर्न पाउने थलो भएकाले महिलाहरुको लागि यो पेशा उत्कृष्ट पेशा हो ।
तर समाजले यस पेशालाई अहिलेसम्म पनि राम्रो नियतले हेर्ने गरेको पाइदैन् । पछिल्लो समय समाजमा मानिसहरुले सोच्ने सोच विचार भने पक्कै परिवर्तन भएको पाईन्छ । कतिपयले राम्रो कुरालाई पनि आफुलाई तल झार्न नराम्रो भनिरहेका हुन्छन् तर मानिसहरुले भनेको कुरालाई सुने पनि आफ्नो बाटो र आफ्नो लक्ष्यलाई लिएर हिड्यो भने यस पेशाबाट महिला दिदि बहिनीहरुले अबश्य सफलता पाउनेछन् । अहिले हेर्ने हो भने हरेक बीमा कम्पनीहरुमा पुरुषको भन्दा महिला अभिकर्ताको सक्रियता बढि पाईन्छ । जसको कारण महिलाहरु यस पेशामा आकर्षित हुने गरेको मैले पाएको छु । मलाई लाग्छ यस पेशा महिलाको लागि धेरै राम्रो पेशा हो । म आफै पनि यस पेशामा सक्रिय भएर लागेको छु । सफलताको बाटोमा अडिग भएर केही गनुपर्छ भन्ने सपना बोकेर हिडेको छु । त्यसैले सबै महिलाहरुका लागि यो स्वतन्त्र र उत्कृष्ट पेशा हो ।
