काठमाडौं । काठमाडौं महानगरपालिकामा पनि स्वास्थ्य बीमा कार्यक्रम सञ्चालन हुने भएको छ।
काठमाडौं महानगरपालिका र स्वास्थ्य बीमा बोर्डबीच बुधबार स्वास्थ्य बीमा कार्यक्रम सञ्चालन गर्न समझदारी भएको हो। समझदारीपत्रमा काठमाडौं महानगरपालिकाका प्रमुख प्रशासकीय अधिकृत बसन्त अधिकारी र स्वास्थ्य बीमा बोर्डका कार्यकारी निर्देशक डा. मदनकुमार उपाध्यायले हस्ताक्षर गरेका छन्।
सहमतिपत्रमा स्वास्थ्य बीमा ऐन, २०७४, स्वास्थ्य बीमा नियमावली, २०७५ र स्थानीय तह स्वास्थ्य बीमा संयोजन समिति गठन तथा सञ्चालन कार्यविधि, २०७८ ले तोकेका मापदण्डका आधारमा सेवा सञ्चालन गरिने उल्लेख छ।
यो कार्यक्रमअन्तर्गत बीमा गरेकाहरुले ५ जनाको परिवारमा १ वर्षमा १ लाख रुपैयाँबराबरको निःशुल्क उपचार सेवा प्राप्त हुन्छ। उक्त रकम बीमा बोर्डले महानगरपालिकाअन्तर्गत रहेको प्रवर्द्धन केन्द्रलाई शोध भर्ना गर्नेछ।
