काठमाडौं । नेपाल बीमा प्राधिकरणले अभिकर्ता इजाजत पत्रका लागि कात्तिक १७ गते देखि सञ्चालन गर्न लागेको अनलाइन परिक्षामा सहभागी हुने उपायबारे सचित्र निर्देशन जारी गरेको छ। प्राधिकरणले अनलाइन परिक्षालाई लिएर परिक्षार्थी र बीमकका कर्मचारीबीच अन्याैलता अझै कायम रहेको पाएपछि सहजीकरण गर्नका लागी बुधबार निर्देशन जारी गरेको हो ।
पहिलो पटक कार्यान्वयनमा ल्याउन लागिएकाले यसको अभ्यास कसरी गर्ने भन्ने विषयमा प्रयोगकर्ता र सहजकर्ता स्वयमबीच देखिएको अन्यौलता हटाउनका लागि प्राधिकरणले चित्र सहित परिक्षामा सहभागी हुने प्रकृयाबारे जानकारी गराएको छ । यो निर्देशन पालना गरेर सम्बन्धित परिक्षार्थीले सहजै परिक्षामा सहभागीता जनाउन सक्नेछन् ।
पहिलो पटक अनलाइन विधिबाट परिक्षा सञ्चालन गर्न लागिएकाले परिक्षार्थी र बीमकको कर्मचारी अझै पनि केही आशंका कायमै रहेको छ। प्राधिकरणले परिक्षामा सहभागी हुनु पूर्व सहभागीताका लागी प्रयोग गरिने सूचना प्रविधिको उपकरणका लागी आवश्यक पर्ने विद्युत आपूर्ती र भरपर्दो इन्टरनेट सेवा सुनिश्चित गर्न समेत परिक्षार्थीसँग अनुरोध गरेको छ।
१ घण्टा ३० मिनेट अवधिका लागी सञ्चालन हुने परिक्षामा एक पटकमा १०० जना परिक्षार्थी मात्र सहभागी हुनसक्नेछन् । परिक्षार्थीले पूर्वनिर्धारित समय सीमाभित्र ५० मध्ये कम्तीमा २५ वटा प्रश्नको सही उत्तर रोज्नुपर्नेछ ।
