काठमाडौं । केयुस्कुल अफ म्यानेजमेन्टको आइडिया एक्सन, इन्भेष्टमेन्ट सर्कल र कुसोमका पूर्व विद्यार्थिहरुकोसंगठन कुसोम अलुम्नाइबिच उद्यमशिलता प्रवद्र्धन गर्न समझ्दारीपत्रमा हस्ताक्षर भएको छ । उक्त एमओयुको उद्देश्य अन्तर्गत कुसोमका विद्यार्थिहरुलाई उद्यमशिलता र लगानी सम्बन्धि गतिविधिहरुमा शिक्षित र संलग्न गराउने लक्ष्य लिइएको छ ।
साथै, एमओयुले तिनै संस्थाहरुसँग सम्बन्धित उद्यमीहरुलाई प्राविधिक सहयोग प्रवाह गर्न एकअर्काको कोर स्ट्रेन्थको लाभ लिन सक्ने बाटो खोल्ने छ । कुसोमका डिन प्रा. देवी प्रसाद बेदारीले यस समझ्दारीले कुसोमका विद्यार्थिमा उद्यमशिलता तर्फ रुची जगाउन तथा कुसोमलाई भविष्यमा उद्यमशिलताको केन्द्रविन्दु बन्न मद्दत गर्ने र यसले देशबाट हुने ब्रेन ड्रेन नियन्त्रणमा महत्वपूर्ण योगदान गर्ने विश्वास व्यक्त गरे ।
त्यसैगरी, कुसोम अलुम्नाइका अध्यक्ष देव प्रकाश गुप्ताले उद्यमशिलता विकास गर्न प्राविधिक सल्लाहका साथै नेटवर्किङको आवश्यक्ता हुनेहुँदा यसमा अलुम्नाइले सहजिकरण गर्ने प्रतिवद्धता व्यक्त गरे ।
इन्क्युबेशन र स्टार्टअप फन्डिङमा एक दशकभन्दा बढीको व्यवहारिक अनुभव बोकेको इन्भेष्टमेन्ट सर्कल नेपाली स्टार्टअप इकोसिस्टममा स्थापित नाम हो । कुसोमको सैद्धान्तिक आधार, इन्भेष्टमेन्ट सर्कलको व्यवहारिक दृष्टिकोण र कुसोम अलुम्नाइको विशाल नेटवर्किङको साथ, यस समझ्दारीले कुसोमलाई राष्ट्रको उद्यमशिलता केन्द्रका रुपमा स्थापित बनाउने अपेक्षा गरिएको छ ।
