काठमाडौं । नेपाल बीमा प्राधिकरणको आयोजनामा दाबी भुक्तानी तथा सम्पत्ति शुद्धिकरण निवारण सम्बन्धमा अन्तरक्रिया तथा प्रशिक्षण कार्यक्रम सम्पन्न भएको छ । उक्त कार्यक्रम आज साउन ३० गते मंगलबार होटल कलश महेन्द्रनगर, कञ्चनपुरमा सम्पन्न भएको हो । कार्यक्रम नेपाल बीमा प्राधिकरणका उप निर्देशक विरोध भट्ट र बीमा प्राधिकरण सुदुरपश्चिम प्रादेशिक कार्यालयका प्रमुख हृदयश्वर पण्डितको अतिथ्यतामा सम्पन्न भएको हो ।
जीवन तथा निर्जीवन बीमा कम्पनीका शाखा प्रमुखहरुको उपस्थितीमा कार्यक्रम सम्पन्न भएको हो । कार्यक्रममा नेपाल बीमा प्राधिकरणका उप निर्देशक भट्टले बीमा ऐनको नयाँ ब्यवस्था अनुसार दाबी भुक्तानीको प्रक्रिया, नीति तथा त्यस सम्बन्धी कानून, लगायतका विषयमा प्रस्तुतीकरण तथा प्रशिक्षण दिएका थिए ।
साथै, उनले गैर कानुनी कमाई र आतंकवादी कार्यबाट संकलित कालो धनलाई बीमा क्षेत्रको माध्यमले शुद्धीकरण गर्ने कार्यलाई कसरी नियन्त्रण गर्ने, यसका प्रकृयाहरु के के हुन, रिपोर्टिङ कसरी गर्ने आदी विषयमा विस्तृत जानकारी दिएका थिए ।
कार्यक्रममा नेपाल बीमा प्राधिकरणका सुदुरपश्चिम प्रादेशिक कार्यालयका प्रमुख हृदयश्वर पण्डितले शाखा प्रमुखरुलाई सम्पत्ति शुद्धीकरण निवारण तथा आतंकवादी क्रियाकलापमा वित्तीय लगानी निवारण सम्बन्धमा विस्तृत प्रशिक्षण दिएका थिए ।
