काठमाडौं । निर्जीवन बीमा व्यवसायमा पुनः मोटर बीमाको बजार हिस्सा बढ्न थालेको छ । गएका वर्षमा सरकारले मोटरको आयातमा कडाइ गर्दा यस तर्फको बीमा शुल्कमा पनि भारी गिरावट भएको थियो । मोटरको आयात बढ्न थाले सँगै चालु आर्थिक वर्षको जेठ महिनासम्ममा यस तर्फको बजार हिस्सा ३३ प्रतिशत पुगेको छ ।
नेपाल बीमा प्राधिकरणले उपलब्ध गराएको तथ्याङ्क अनुसार गत वर्षको जेठ महिनामा मात्रै मोटर बीमाको बजार हिस्सा २५ प्रतिशत थियो । तर यस वर्ष बीमा कम्पनीहरुले मोटर बीमाबाट मात्रै १२ अर्ब ७ करोड २७ लाख रुपैयाँ बीमा शुल्क आर्जन गरेका छन् ।
जेठ महिनासम्ममा कुल बीमा शुल्क आर्जन ३६ अर्ब १९ करोड रहेको छ । जसमा मोटरले मात्रै ३३ प्रतिशत बजार ओगटेको छ । यस वर्ष हवाई बीमा व्यवसायमा भने उल्लेख्य सुधार देखिदैन । हवाइको बजार हिस्सा ५.४० प्रतिशत मात्रै छ । यस वर्ष हवाई र विविधको पोर्टफेलियो तल झरेको छ । मोटर बाहेक अन्य पोर्टफेलियोको हिस्सामा खासै सुधार देखिदैन ।
सम्पत्ती बीमाबाट कम्पनीहरुले ७ अर्ब ९६ करोड ११ लाख रुपैयाँ बीमा शुल्क आर्जन गरेका छन् । यस वर्ष बैंक वित्तीय संस्थाले घर तथा आवास निर्माणमा बढि लगानी गरेका छन् । बैंकहरुले घर तथा सम्पत्ती धितोमा राखेर कर्जा प्रवाह गर्दा सम्बन्धित सम्पत्तीको अनिवार्य बीमा गर्नै पर्ने व्यवस्था गरिदिएको छ । यसले गर्दा पनि यस तर्फको पोर्टफेलियोमा सामान्य सुधार देखिन्छ ।
इन्जिनियरिङ बीमा मार्फत कम्पनीहरुले ६ अर्ब १८ करोड रुपैयाँ बीमा शुल्क आर्जन गरेका छन् । यसको कुल बीमा शुल्क आर्जनमा १७ प्रतिशत योगदान रहेको छ । कृषि तथा लघु बीमामा भने खासै सुधार देखिदैन । सामुन्द्रिक बीमा मार्फत कम्पनीहरुले एक अर्ब ८१ करोड रुपैयाँ बीमा शुल्क आर्जन गरेका छन् ।
हवाइ बीमा मार्फत कम्पनीहरुले एक अर्ब ९५ करोड रुपैयाँ बीमा शुल्क आर्जन गर्दा विविध तर्फ भने ४ अर्ब ५ करोड रुपैयाँ रहेको छ । नेपाल लगानी विश्वका जुनसुकै मुलुकमा पनि बीमा फोर्सफुल मानिन्छ । सरकारले बीमालाई अनिवार्य गर्ने वित्तीकै यसको दायरा पनि बढ्दै जान्छ । नेपालमा सरकारले मोटर बीमालाई अनिवार्य गरेकाले यस तर्फको बजार सर्वाधिक ठुलो रहेको छ ।