काठमाडौं । नेको इन्स्योरेन्स लिमिटेडले यस वर्ष प्रस्ताव गरेको १५ प्रतिशत बोनश शेयर वितरण गरेको छ । कम्पनीले गत माघ १५ गते २७औं वार्षिक साधारण सभामार्फत उक्त बोनश शेयर वितरणको प्रस्ताव पारित गरेको थियो । उक्त सभामार्फत कम्पनीले बोनस शेयर र कर प्रयोजनका लागि शून्य दशमलव ७९ प्रतिशत नगद लाभांश वितरणको प्रस्तावसमेत पारित गरेको थियो ।
कम्पनीले वार्षिक साधारण सभा सम्पन्न भएको दुई महिनाभित्र बोनश शेयर धितोपत्र दोस्रो बजारमा सूचिकृत गराई सम्बन्धित शेयरधनीहरूको हितग्राही खातामा जम्मा गरेको जनाएको छ । हालसम्म पनि हितग्राही खाता नखोलेका सदस्यहरूको हकमा भने खाता खोलेपछि जम्मा गरिने कम्पनीले बताएको छ ।
कम्पनीले २७औं वार्षिक साधारण सभा प्रयोजनका लागि माघ ३ गते एक दिन बुक क्लोज गरेको थियो । यसको आधारमा माघ २ गतेसम्म कायम शेयरधनीहरूले मात्र कम्पनीको बोनश शेयर प्राप्त गरेका छन् ।
माघ २ गतेसम्म शेयर धितो बन्धक राखी कर्जा लिएका सदस्यहरूको हकमा बोनश शेयर कर्जा प्रवाह गर्ने सम्बन्धित बैंक तथा वित्तीय संस्थाको नाममा नै रोक्का जनाई हितग्राही खातामा जम्मा गरिएको छ । राफसाफ भइसकेको भए सम्बन्धित बैंक तथा वित्तीय संस्थामा सम्पर्क गरी फुकुवा गर्नसमेत कम्पनीले आग्रह गरेको छ ।
कम्पनीको शेयर रजिष्ट्रारमा आरविवि मर्चेन्ट बैंकिङ लिमिटेड रहेको छ ।
