काठमाडौं । हिमालयन रिइन्स्योरेन्स कम्पनीको सम्पुर्ण वित्तीय सूचकमा उल्लेख्य सुधार देखिएको छ । कम्पनीले चालु आर्थिक वर्षको दोस्रो त्रैमाशिक अवधिमा खुद बीमा शुल्क आर्जन ७ गुणाले बढाउन सफल भएको छ । कम्पनीले समिक्षा अवधिमा २ अर्ब ३६ करोड रुपैयाँ आर्जन गरेको छ । गत वर्षको यहि अवधिमा जम्मा २९ करोड ९९ लाख रुपैयाँ मात्रै थियो । त्यस्तै कुल बीमा शुल्क आर्जन २ अर्ब ४८ करोड रुपैयाँ रहेको छ ।
नेपाल बीमा प्राधिकरणले नेपाल पुनर्बीमा कम्पनीले पाउदै आएको डाइरेक्सेसनको आधा हिमालयन रिलाई दिनै पर्ने बनाइदिए सँगै कम्पनीको बीमा शुल्क आर्जनमा उल्लेख्य सुधार देखिएको हो ।
बीमा शुल्क आर्जनमा उल्लेख सुधार देखिए पनि मुनाफामा भने धेरै नै गिरावट आएको छ । कम्पनीको मुनाफा ६२ प्रतिशतले घटेर समिक्षा अवधिमा ४ करोड ६३ लाख रुपैयाँमा खुम्चिएको छ । गत वर्षको यहि अवधिमा कम्पनीले १२ करोड ४७ लख रुपैयाँ मुनाफा आर्जन गरेको थियो ।
जगेडा कोष भने ३७.८७ प्रतिशतले बढेको छ । कोषमा १७ करोड ७७ लाख रुपैयाँ जम्मा भएको छ । बीमा कोषमा १३ करोड ६९ लाख रुपैयाँ जम्मा भएको छ । व्यवसायमा बृद्धि भए सँगै खुद दाबी भुक्तानीमा पनि उल्लख्य सुधार भएको छ । समिक्षा अवधिमा कम्पनीले १४ करोड ७७ लाख रुपैयाँको दाबी भुक्तानी गरेको छ ।
बीमा शुल्क आर्जनका लागि कम्पनीले पुनर्बीमा कमिशन मात्रै ६० करोड ८० लाख रुपैयाँ खर्चिएको छ । गत वर्ष यस्तो खर्च ५ करोड ६० लाख रुपैयाँ मात्रै थियो । कम्पनीले अझै ४२ करोड ४१ लाख रुपैयाँ दाबी भुक्तानी गर्न बाँकी छ ।
