काठमाडौं । नेपाल धितोपत्र बोर्डबाट दुई नयाँ म्युचुअल फण्डले इकाई निष्काशन गर्नका लागि स्वीकृति पाएका छन् । सिद्धार्थ इन्भेष्टमेन्ट ग्रोथ स्किम ३ र कुमारी सुनौलो योजनाले इकाई निष्काशन गर्न सेबोनबाट अनुमति पाएका हुन् ।
सिद्धार्थ म्युचुअल फण्डअन्तर्गत सञ्चालनमा आउने सिद्धार्थ इन्भेष्टमेन्ट फण्डले १२ करोड इकाई निष्कासन गर्नका लागि स्वीकृति पाएको हो । कोष प्रवर्द्धक सिद्धार्थ बैंक र योजना व्यवस्थापक सिद्धार्थ क्यापिटल लिमिटेड रहेको छ । सेबोनबाट स्वीकृति पाएसँगै यस योजनाले १० रुपैयाँ अंकित दरका कुल १२ करोड बराबरको इकाई विक्री गर्नेछ ।
त्यस्तै कुमारी म्युचुअल फण्डअन्तर्गत सञ्चालनमा आउने कुमारी सुनौलो योजनाले १० करोड इकाई निष्काशन गर्न सेबोनबाट फागुन ३ गते स्वीकृति पाएको हो । कोष प्रवर्द्धक कुमारी बैंक र योजना व्यवस्थापक कुमारी क्यापिटल लिमिटेड रहेको छ । सेबोनबाट स्वीकृति पाएसँगै यस योजनाले १० रुपैयाँ अंकित दरका कुल १० करोड बराबरको इकाई विक्री गर्नेछ ।
