काठमाडौं । वित्तीय बजारमा तरलता संकटका कारण अपेक्षितरुपमा नयाँ व्यवसाय गर्न नसकेका जीवन बीमा कम्पनीहरुलाई यसपटकको असारमसान्तममा नविकरण बीमाशुल्ककै भर हुने देखिएको छ ।
विगतका आर्थिक वर्षहरुमा झैं असारमसान्तमा ४ महिना बराबरको कारोबार गर्दै आएका जीवन बीमा कम्पनीहरुको लागि यसवर्षको असारमसान्त उस्तै हुने संभावना ज्यादै न्यून छ । सर्वसाधारणको हातमा पर्याप्त नगद वा बैंक खातामा मौज्दात नभएका कारण जीवन बीमालेखको बिक्रीको गति सुस्त रहेको छ ।
ब्यांकासुरेन्सको टेको नपाएपछि एकल बीमाशुल्क बीमा योजना बिक्री गरेर व्यवसायमा कृत्रिम प्रगती हासिल गरेका जीवन बीमकहरुलाई अहिले ज्यादै सकस छ । पछिल्लो समयमा मुद्दती निक्षेपको बदलामा प्रथम बीमाशुल्क मागेर केही जीवन बीमकले आफ्नो व्यापार चलाई रहेका छन् । बैंक तथा वित्तीय संस्थामा वित्तीय तरलताको अवस्था सहज भएसँगै निक्षेपको बदलामा प्रथम बीमाशुल्कको लागी मोलतोल गर्ने सम्भावना पनि अन्त्य हुनेछ ।
पीडित ऋणीका अनुसार बैंक र जीवन बीमकको मिलेमतोमा कर्जा लिनको लागी जीवन बीमा गर्नैपर्ने शर्त तेस्र्याएर ऋणीको घाँटी अठ्याउने काम भइरहेको छ । जसरी पनि ऋण चाहिएकाले बैंकका कर्मचारीले जे भन्छन्,त्यसमा हस् हजुर भन्नुको विकल्प छैन ।
जीवन बीमा कम्पनीका शाखा प्रबन्धकहरु गत वर्षसम्म वर्षान्तमा सापटी वा ऋण लिएरै भएपनि प्रथम बीमाशुल्कको लक्ष्य पुरा गर्न पैसाको जोहो गर्दै आएका थिए । तर यसपटक बैंक तथा वित्तीय संस्थासँगै लगानीयोग्य रकम नहुँदा उनीहरुले सापटी वा ऋण प्राप्त गर्ने मूल नै सुकेको छ ।
तनाव छ सर, तनाव, जुम मिटिङमा हाकिमले व्यापार किन भएन मात्रै सोध्छन्, नयाँ मध्येको बीमा कम्पनीका एक क्षेत्रिय प्रबन्धकले गुनासो गर्दै भने, बजारमै पैसा नभएको अवस्थामा हामीले पोहोरकै जस्तो कसरी बीमालेख बेच्न सक्छौं ?
