काठमाडौं । सानिमा जनरल इन्स्योरेन्स कम्पनीले भर्चुअल माध्यम ‘जुम’ मार्फत मात्रै साधारणसभा गर्ने भएको छ । कोभिड १९ को बढ्दो संक्रमण सँगै स्थानिय प्रशासनले २५ जना भन्दा धेरै भेला हुन नपाउने व्यवस्था गरे सँगै कम्पनीले विद्युतिय माध्यम ‘जुम एप’ मार्फत सञ्चालन गर्ने भएको हो ।
कम्पनीले यहि पुस ३० गते चौथो वार्षिक साधारणसभा गर्दैछ । आर्थिक वर्ष २०७७/७८ को मुनाफाबाट लाभांश नदिने घोषणा गरेको कम्पनीले लेखापरिक्षण प्रतिवेदन, सञ्चालक समितिको तर्फबाट अध्यक्षले प्रस्तुत गरेको प्रतिवेदन लगायतका वित्तीय विवरण पारित गर्ने योजना रहेको छ ।
साधारणसभा प्रयोजनका लागि पुस १९ गते एक दिन बुक क्लोज गरिएको थियो । पुस १८ गतेसम्म कायम शेयरधनीले साधारणसभामा भाग दिन पाउने छन् । साधारणसभामा उपस्थितिका लागि कम्पनीले जुम मिटिङ आइडी र पासवर्ड उपलब्ध गराउने छन् । आर्थिक वर्ष सकिएको ६ महिना भित्रमा साधारणसभा सम्पन्न गर्नेमा सानिमा जनरल मात्रै पर्ने भएको छ ।
