काठमाडौं । सोमबार नेपालीहरुका लागि कोरोना भाइरसको दुखद खवर प्राप्त भएको छ । एकै पटक हालसम्मकै उच्च ७२ जना कोरोना भाइरस संक्रमित देखिएको छ भने आजै मृत्यु भएर दाहसंस्कार गरिसकिएको व्यक्तिमा पनि कोरोना पुष्टि भएपछि बीरगन्जमा तनाव बढेको छ । यससँगै नेपालमा कोराना संक्रमित व्यक्तिहरुको संख्या ६ सय ७५ पुगेको स्वास्थ्य मन्त्रालयले जनाएको छ । कूल मृतकको संख्या चार पुगेको छ ।
स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीका अनुसार रौतहटमा २६, बारामा २३, दैलेखमा ७, बाँकेमा ४ तथा काठमाडौं, धनुषा र कपिलवस्तुमा ३–३ जना कोरोना संक्रमित फेला परेका हुन् । यस्तै सप्तरीमा २ जना र बर्दियामा १ जनामा पनि कोरोना संक्रमण पुष्टि भएको छ । आज फेला परेकाहरु काठमाडौंको उत्तरी क्षेत्रका हुन् । टोखा वडा नं ३ र ६ तथा बुढानिलकण्ठ वडा नं ३ का स्थानीय मानिसमा कोरोना भाइरसको संक्रमण देखिएको छ ।
यस्तै रौतहटको राजपुर परहदवा– २, ६ र ८ तथा इशनाथ– २ मा संक्रमित फेला परेका छन् । बाराको गढीमाई नगरपालिकामा २१ जना र कलैया नगरपालिका कोटवाली–१ मा २ जनामा संक्रमण पुष्टि भएको स्वास्थ्य मन्त्रालयले जनाएको छ ।
बर्दियाको बाँसगढी–९ मा एक जना, बाँकेको राप्ती सोनारी–७ र डुडुवा २ मा चार जनामा कोरोना संक्रमण देखिएको छ । यस्तै सप्तरीको डाक्नेश्वरी गाउँपालिकामा २ जना र धनुषाको नगराइन नगरपालिका(३ मा तीन जनामा संक्रमण पुष्टि भएको छ ।
