काठमाडौं । नेपाल इन्स्योरेन्सले चालु आर्थिक वर्षको दोस्रो त्रैमासको वित्तीय विवरण प्रकाशन गरेको छ । कम्पनीले ८६ हजार ८१ वटा बीमालेख जारी गरी ६२ करोड १ लाख रुपैयाँ कुल बीमाशुल्क संकलन गरेको छ । यस अवधिमा कम्पनीले एक हजार ५३८ वटा दावी बापत १३ करोड ३१ लाख रुपैयाँ कुल दाबी भुक्तानी गरेको छ । कम्पनीले कूल २ हजार ४५३ बीमा बीमितलाई दावी भुक्तानी बापत ८६ करोड ९० लाख रुपैयाँ भुक्तानी गर्न बाँकी छ ।
यस अवधिसम्ममा इन्स्योरेन्सले ३२ करोड १९ लाख रुपैयाँ खुद बीमाशुल्क संकलन गरेको छ । गत आर्थिक वर्षको यसै अवधिको तुलनामा ८ करोड १८ लाख रुपैयाँले बढी हो । गत आर्थिक वर्षको दोस्रो त्रैमाससम्ममा कम्पनीले २४ करोड १ लाख रुपैयाँ खुद बीमा शुल्क आर्जन गरेको थियो।
चुक्ता पूँजी एक अर्ब ९ करोड ५५ लाख रुपैयाँ रहेको नेपाल इन्स्योरेन्सको जगेडा कोषमा ३२ करोड २५ लाख रुपैयाँ, बीमा कोषमा ३४ करोड १३ लाख रुपैयाँ सञ्चित छ । यस अवधिसम्ममा कम्पनीले पुनर्बीमा कमिशनबाट ७ करोड ८६ लाख रुपैयाँ र लगानी कर्जा तथा अन्य आयबाट ३ करोड १८ लाख रुपैयाँ आम्दानी गरेको छ ।
समीक्षा अवधिसम्ममा ८ करोड ७४ लाख रुपैयाँ खुद नाफा कमाएको छ । इन्स्योरेन्सको यो नाफा गत आर्थिक वर्षको यहि अवधिको तुलनामा १९.४४ प्रतिशतले बढी हो । गत आर्थिक वर्ष यहि अवधिसम्ममा इन्स्योरेन्सले ७ करोड ३२ लाख रुपैयाँ खुद नाफा कमाएको थियो । कम्पनीको प्रतिशेयर आम्दानी १५ रुपैयाँ ९६ पैसा, प्रतिशेयर नेटवर्थ १६० रुपैयाँ ६० पैसा रहेको छ ।
