रेष्टुरेन्ट व्यवसायमा जम्न नसकेका ढकाल जीवन बीमामा रमाउँदै

1250
नेत्र ढकाल, सिनियर एजेन्सी म्यानेजर, नेपाल लाइफ इन्स्योरेन्स

स्नातक तह उत्तिर्ण, पेशा रेष्टुरेन्टको व्यवसाय । बीमा क्षेत्रप्रतिको खासै ज्ञान भने थिएन । व्यवसायमै जीवन जोखिरहेका नेत्र ढकालले बीमा व्यवसायबाट आम्दानी गर्न सकिन्छ भन्ने कहिले सोचेका थिएनन् । बीमा बारे धेर–थोर ज्ञान भएतापनि अभिकर्ता पेशा बारे जानकार थिएनन् ढकाल ।

शुद्ध रेष्टुरेन्टको व्यावसायमा लागि परेका नेत्रलाई उनका एक जना सरले बीमा अभिकर्ता पेशामा जोडिन सल्लाहा दिए । उनै सरका कुराबाट नेत्र बीमा अभिकर्ता पेशामा जोडिन प्रेरित भए । अभिकर्ता पेशामा लागेपछि मात्रै नेत्रले बीमा अभिकर्ता पेशा बीना लगानी नै मनग्गे आम्दानी गर्न सकिने पेशा रहेछ भन्ने थाहा पाए । नेत्रले सम्हाल्दै आएको व्यवसायमा लाखौँ खर्च गर्नुपर्ने हुन्थ्यो । आफुले सोचे जति प्रतिफल नपाईने र कहिले काँही त लगानी नै नउठ्ने समस्या पनि हुन्थ्यो । लगानी नै नगरिकन अधिकतम प्रतिफल पाइने पेशाका रुपमा अभिकर्ता पेशालाई लिँदै स्याङ्जाका नेत्र ढकाल विगत १० वर्षअघि बीमा अभिकर्ता पेशामा जोडिन पुगे ।

त्यो बेला बीमा बुझ्ने मानिस थोरै थिए, जति बेला ढकालले अभिकर्ता पेशाको यात्रालाई अघि सारेका थिए । अभिकर्ता पेशाको लाइसेन्स हातमा पारेपछि उनले सानै बीमाङ्क रकमको भएपनि बीमा गर्न सफल भए । ‘मेरो पहिलो बीमितले मैले तपाईलाई चिन्छु, तपाई आवद्ध भएको कम्पनीलाई चिन्छु भन्ने हिसाबले बीमा प्रस्ताव स्वीकार गरे’ नेत्रले विगत सम्झदै भने । पहिलो बीमा गर्न सफल भए पछि ढकालले बीमा अभिकर्ता पेशामा नै निरन्तर लागि पर्ने अठोट लिए ।

बीमा अभिकर्ता पेशाले ढकाललाई धेरै कुरा सिकायो । नेत्र आर्थिक रुपमा मात्रै सबल भएननन् । उनको जनसम्पर्क पनि विस्तार हुँदै गयो । हरेक मान्छेहरुसँग सम्बन्ध स्थापित हुँदै गयो । पैसाका साथसाथै उनले समाजमा राम्रो सम्बन्ध स्थापित गर्न सफल भए ।

आर्थिक तथा सामाजिक रुपले उत्कृष्ट पेशाका रुपमा बीमा अभिकर्ता पेशालाई लिने नेत्र यो पेशामा लागेर सन्तुष्ट रहेको बताउँछन् । बिना लगानी नै मिहेनतका साथ लागि पर्ने जो कोही पनि यो पेशामा सफल हुने उनले बताए । नेपाली समाजमा बीमा चेतनाको कमी रहेको कुरामा उनले जोड दिँदै भने, “केही प्रतिशत मात्रै मानिसहरु बीमाको पहुँचमा आएका छन्, दुर दराजमा रहेका नेपालीहरुमा अझै पनि बीमा चेतनाको अभाव रहेको छ ।” बीमाको दायरा बढाउनका लागि बीमा कम्पनी, अभिकर्ता मात्रै नभई सरकार नै लागि पर्नुपर्ने कुरामा नेत्रको जोड छ ।

नेत्र भन्छन्, बीमा कम्पनी (बीमक) र बीमा गर्ने व्यक्ति (बीमित)को बीचमा गरिने कानूनी करार बीमा हो । बीमा जोखिम बहनका साथै बचतका लागि पनि हो । बीमा अभिकर्ताकै कारणले गर्दा बीमा व्यवसाय अगाडि बढेको दावी गर्दै नेत्रले भने, “बीमा कम्पनी (बीमक) र बीमा गर्ने व्यक्ति (बीमित) लाई जोड्ने–भेट्ने माध्यम बीमा अभिकर्ता हुन् । बीमा अभिकर्ता बीमा व्यवसायका मेरुदण्ड हुन् । ”

यस पेशामा क्षमतावान बीमा अभिकर्ता मात्रै सफल हुन सक्ने कुरामा जोड दिँदै नेत्र भन्छन्, असलपन, धैर्यता, बीमा बारेको ज्ञान, सकारात्मक सोच, वास्तविकतालाई दर्साउन सक्न¬े खुवीलगायतका बीमा समिति, आफु आवद्ध भएको कम्पनीका बारेमा पूर्ण रुपमा जानकार हुनुपर्दछ । अभिकर्ताहरुलाई शिपमूलक तालिम दिने, जो कोही अभिकर्ता बजारमा गइसकेपछि पोलिसी लिएर आउन सक्ने खालको शिप दिन बीमा कम्पनीहरुले दिन जरुरी रहेको उनले बताए ।

बीमा व्यावसाय विस्तारका लागि बीमा बजारमा क्षमतावान अभिकर्ता ल्याउन जरुरी रहेको कुरामा उनको जोड छ । बीमा व्यवसायमा अभिकर्ता पेशा अगाल्छु भन्नेहरुलाई नेत्र सकारात्मक सोचका साथ लागि पर्ने मनसाय बोकेर आउन सल्लाहा दिन्छन् । २०६६ सालदेखि बीमा अभिकर्ता पेशामा जोडिएका नेत्र ढकाल हाल नेपाल लाइफ इन्स्योरेन्स कम्पनीमा सिनियर एजेन्सी म्यानेजरका रुपमा कार्यरत छन् । (ढकाल नेपाल लाइफ इन्स्योरेन्स बीमक समितिको केन्द्रिय सदस्य हुन् ।)

यसमा तपाइको मत

कृपया आफ्नो प्रतिक्रिया दिनु होला ।
कृपया आफ्नो नाम यहाँ लेख्नु होस्