काठमाडौं । देशैभरका निर्माण व्यवसायीहरु आन्दोलनमा उत्रिएका छन् । नेपाल निर्माण व्यवसायी महासंघको नेतृत्वमा बुधबार विहान काठमाडौंको माइतीघरदेखि त्रिपुरेश्वरसम्म विरोध र्याली निकालिएको हो । र्यालीमा सयौं व्यवसायीहरु सहभागी छन् । व्यवसायीहरु ‘सार्वजनिक खरिद ऐनको संशोधित व्यवस्था परिमार्जन गर’, ‘राष्ट्रिय निर्माण व्यवसायीको संरक्षण गर’ जस्ता नाराहरु लेखिएको प्लेकार्ड बोकेर प्रदर्शन गरेका छन् ।
सार्वजनिक खरिद ऐनको आठौं संशोधन २०७६ को मस्यौदामा राखिएका गलत प्रावधानका विरुद्धमा देशैभरिका निर्माण व्यवसायीहरु सडकमा उत्रन बाध्य भएका महासंघका अध्यक्ष रवि सिंहले बताए । अध्यक्ष सिंहले सो ऐनको मस्यौदामा म्याद थप र बैंक क्रेडिट लाइनलगायतका विषयमा महासंघले सम्झौताहिन आन्दोलन गर्ने बताए ।
