काठमाडौं । नेको इन्स्योरेन्स कम्पनीले चालु आर्थिक वर्षको पहिलो त्रैमासको वित्तीय विवरण प्रकाशन गरेको छ । कम्पनीले चालु आर्थिक वर्षको पहिलो त्रैमासमा ७ करोड ५३ लाख रुपैयाँ खुद नाफा कमाएको छ । गत आर्थिक वर्षको सोही अवधिको तुलनामा कम्पनीको नाफा ३२ दशमलव ८० प्रतिशतले बढी हो । गत आर्थिक वर्षमा कम्पनीले ५ करोड ६७ लाख रुपैयाँ मात्र खुद नाफा कमाएको थियो ।
चालु आर्थिक वर्षको पहिलो त्रैमासमा कम्पनीले ५६ करोड २ लाख रुपैयाँ कुल बीमा शुल्क आर्जन गर्न सफल भएको छ गत आर्थिक वर्षको यसै अवधिमा कम्पनीले ५२ करोड रुपैयाँ मात्र कुल बीमा शुल्क आर्जन गरेको थियो ।
त्यस्तै, खुद बीमा शुल्क आर्जन ८ दशमलव ६५ प्रतिशतले बढाएर ३३ करोड १३ लाख रुपैयाँ आर्जन गरेको छ । गत आर्थिक वर्षमा कम्पनीले ३० करोड ४९ लाखरुपैयाँ मात्र खुद बीमा शुल्क आर्जन गरेको थियो ।
चालु आर्थिक वर्षको यसै अवधिसम्ममा कम्पनीले १० करोड १० लाख रुपैयाँ खुद दाबी भुक्तानी गरेको छ भने ३९ करोड ३७ लाख रुपैयाँ कुल भुक्तानी हुन बाँकी छ ।
१ अर्ब १७ करोड ६२ लाख रुपैयाँ चुक्ता पुँजी रहेको कम्पनीको ४९ करोड ७६ लाख रुपैयाँ संञ्चिती गरेको छ भने बीमा कोषको आकार पनि ४५ करोडबाट बढाएर ६४ करोड ५० लाख पुर्याउन कम्पनी सफल भएको छ ।
त्यस्तै, प्रतिसेयर आम्दानी २२ रुपैयाँ ८१ पैसा (वार्षिक) छ भने प्रतिसेयर नेटवर्थ २ सय २ रुपैयाँ ३० पैसा रहेको छ ।
