बिजयाँ बास्कोटा
चालु आर्थिक बर्ष २०७५/७६ को पहिलो त्रैमास अवधिमा निर्जीवन बीमा कम्पनीहरुको बीमाशुल्क आर्जन औसत २४ प्रतिशतले बढेको छ । कम्पनीहरुले प्रकाशन गरेको वित्तिय विवरण अनुसार चालु आवको असोज महिना सम्मममा १६ वटा पुराना निर्जिवन बीमा कम्पनीहरुले ५ अर्ब ७९ करोड रुपैयाँ बीमाशुल्क आर्जन गरेका छन् । यो रकम गत आवको सोही अवधिको तुलनामा १७ प्रतिशतले बढी हो ।
चालु आवको पहिलो त्रैमास अवधिमा पुराना जिर्नीवन बीमा कम्पनीहरु मध्ये हिमालयन जनरल इन्स्योरेन्स कम्पनीले सबैभन्दा बढी बीमाशुल्क आर्जन गरेको छ । गत आवको सोही अवधिको तुलनामा चालु आवमा कम्पनीको बीमाशुल्क आर्जन ७२ प्रतिशतले बढेको छ । उक्त अवधिमा कम्पनीले ४५ करोड ८५ लाख रुपैयाँ बीमाशुल्क आर्जन गर्न सफल भएको छ । गत आवको सोही अवधिमा कम्पनीले २६ करोड ५७ लाख रुपैयाँ बीमाशुल्क आर्जन गरेको थियो ।
त्यस्तै गत आवको तुलनामा चालु आवमा बीमाशुल्क बृद्धि भएको आधारमा नेपाल इन्स्योरेन्स कम्पनी दोस्रोमा परेको छ । गत आवको तुलनामा चालु आवको सोही अवधिमा कम्पनीको बीमा शुल्क आर्जन ५१ प्रतिशतले बढेको छ । चालु आवको पहिलो त्रैमासमा कम्पनीले ३२ करोड १३ लाख रुपैयाँ बीमाशुल्क आर्जन गर्न सफल भएको छ । गत आवको सोही अवधिमा कम्पनीले २१ करोड १८ लाख रुपैयाँ बीमाशुल्क आर्जन गरेको थियो ।
तेस्रोमा भने आईएमई जनरल इन्स्योरेन्स परेको छ । कम्पनीको बीमाशुल्क आर्जन ४६.६४ प्रतिशतले बढेको छ । कम्पनीले चालु आवको असोज मसान्त सम्ममा ३१ करोड ७४ लाख रुपैयाँ बीमाशुल्क आर्जन गरेको छ । गत आवको सोही अवधिमा भने कम्पनीले २१ करोड ६४ लाख रुपैयाँ आर्जन गरेको थियो ।
सबैभन्दा धेरै बीमाशुल्क आर्जन गर्ने कम्पनीहरु
चालु आवको पहिलो त्रैमास अवधिमा शिखर इन्स्योरेन्स कम्पनीले सबैभन्दा धेरै बीमाशुल्क आर्जन गर्न सफल भएको छ । कम्पनीले असोज मसान्त सम्ममा ७ करोड ७० लाख रुपैयाँ बीमाशुल्क आर्जन गरेको छ । त्यस्तै, दोस्रोमा सगरमाथा इन्स्योरेन्स परेको छ । कम्पनीले पहिलो त्रैमास अवधिमा ६० करोड ५८ लाख रुपैयाँ बीमाशुल्क आर्जन गरेको छ । तेस्रोमा परेको सिद्धार्थ इन्स्योरेन्सले ५२ करोड ६३ लाख रुपैयाँ बीमाशुल्क आर्जन गरेको छ ।
बीमाशुल्क घटेका कम्पनीहरु
चालु आवको पहिलो त्रैमास अवधिमा एभरेष्ट इन्स्योरेन्स कम्पनीको बीमाशुल्क सबैभन्दा धेरैले घटेको छ । कम्पनीको बीमाशुल्क आर्जन २ गुणा भन्दा धेरैले घटेर २० करोड ७१ लाख रुपैयाँमा सिमित भएको छ । त्यस्तै, युनाईटडे इन्स्योरेन्स कम्पनीको १५ प्रतिशत, राष्ट्रिय बीमा संस्थानको १२ प्रतिशत र प्रुडेन्सियल इन्स्योेरेन्स कम्पनीको बीमाशुल्क आर्जन १ प्रतिशत भन्दा धेरैले घटेको छ ।
नयाँ कम्पनीहरुले ९ करोड बीमाशुल्क आर्जन गरे
चालु आवको पहिलो त्रैमास अवधिमा नयाँ निर्जीवन बीमा कम्पनीहरुले ९ करोड ७९ लाख रुपैयाँ बीमाशुल्क आर्जन गरेका छन् । उक्त अवधिमा सानिमा इन्स्योरेन्सले १ करोड ५३ लाख, जनरल इन्स्योरेन्स ३ करोड ९६ लाख र अजोड ४ करोड २९ लाख रुपैयाँ बीमाशुल्क आर्जन गर्न सफल भएको छ ।
