काठमाडौं । निर्जीवन बीमा कम्पनीहरुले आफ्नो लगानीको क्षेत्रलाई विस्तार गर्न थालेका छन् । बीमा समितिको निर्देशन अनुसार निर्जिवन बीमा कम्पनीहरुले लगानी विविधिकरण गर्दै बैंकको मुद्दती बाहेक शेयर, ऋणपत्र, कृषि पूर्वाधार क्षेत्रमा पनि लगानी गरेका छन् । नेपालमा सञ्चालित २० वटा निर्जिवन बीमा कम्पनीहरुले कूल ६० अर्ब ४६ करोड ३४ लाख ७६ हजार रुपैयाँ विभिन्न क्षेत्रमा लगानी गरेका छन् ।
यसअघि निर्जिवन बीमा कम्पनीहरुले लगानी कोष तथा पुँजि परिचालन बैंकको मुद्दती निक्षेपमा मात्र राख्ने गरेका थिए । आर्थिक बर्ष २०७६/७७ समितिले लगानी निर्देशिका जारी गरेसँगै बीमा कम्पनीहरुलाई अन्य क्षेत्रमा समेत लगानी गर्ने बाटो खुल्ला भएको हो ।
समितिको उक्त निर्देशन बमोजिम निर्जिवन बीमा कम्पनीहरुले गत आर्थिक बर्षको पहिलो त्रैमासको अवधिसम्ममा नेपाल सरकारको वचतपत्र तथा ऋणपत्र, नेपाल पुर्वधार बैंकको मुद्दती निक्षेप, सूचीकृत पब्लिक कम्पनीको साधारण शेयर, कृषि, पर्यटन र जलस्रोत लगायतका पूर्वाधार, म्युचअल फण्ड र नागरिक लगानी कोष क, ख, ग वर्गका बैंक तथा वित्तीय संस्थाको मुद्दती निक्षेपमा र अन्य लगानीका क्षेत्रहरुमा समेत लगानी गरेका छन् ।
बीमा समितिको तथ्याङ्क अनुसार असोज मसान्तसम्ममा निर्जीवन बीमा कम्पनीहरुले बैंकको मुद्दती निक्षेपमा ५० अर्ब ११ करोड रुपैयाँ लगानी गरेको छ भने बाँकी अन्य क्षेत्रमा लगानी गरेका छन् । बीमा समितिबाट प्राप्त तथ्याङ्क अनुसार निर्जीवन बीमा कम्पनीहरुले पहिलो त्रैमासको अन्त्यसम्ममा क वर्गका बैंक, ख वर्गको बैंक, ग वर्गका बैंकहरु र नेपाल पूर्वधार बैंकको मुद्धती निक्षेपमा ५० अर्ब ११ करोड रुपैयाँ मुद्दती निक्षेपमा रकम संकलन गरेका हुन् ।
समितिको तथ्याङ्क अनुसार निर्जीवन बीमा कम्पनीहरुले क वर्गका बैंकहरुमार्फत ४२ अर्ब ३९ करोड रुपैयाँ, ख वर्गका बैंकहरुमा ५ अर्ब ९२ करोड रुपैयाँ, ग वर्गका बैंकहरुमा ८५ करोड ३३ लाख रुपैयाँ र नेपाल पूर्वधार बैंकको मुद्धती निक्षेपमा ९४ करोड १६ लाख रुपैयाँ मुद्धती निक्षेपमा लगानी गरेका छन् ।
त्यस्तै, मुद्दती निक्षेप बाहेक निर्जिवन बीमा कम्पनीहरुले सबैभन्दा धेरै बैंक तथा वित्तीय संस्थाको अग्राधिकार शेयर, अन्य लगानी, सूचीकृत पब्लिक डिभेन्चरमा धेरै लगानी गरेका छन् ।
त्यस्तै, बैंकहरुको मुद्दती निक्षेप बाहेक निर्जिवन बीमा कम्पनीहरुले नेपाल सरकारको बचतपत्र तथा ऋणपत्रमा ६३ करोड ३८ लाख रुपैयाँ, क, ख, र ग वर्गको बैंक तथा वित्तीय संस्थाको अग्राधिकार शेयरमा ५ अर्ब ३९ करोड रुपैयाँ र ऋणपत्रमा ३ अर्ब ५८ करोड रुपैयाँ, सूचीकृत पब्लिक कम्पनीको सुरक्षित डिबेन्चरमा १६ करोड ७८ लाख रुपैयाँ, कृषि पर्यटन र जलस्रोत लगायतका पूर्वधारमा १३ करोड ४४ लाख रुपैयाँ, म्युचअल फण्ड र नागरिक लगानी कोषमा ३३ करोड ९१ लाख रुपैयाँ र अन्य लगानीमा ९ करोड २८ लाख रुपैयाँ लगानी गरेका छन् ।
