काठमाडौं । शेयर बजार पछिल्लो ६ कारोबार दिनदेखि बढिरहेको छ। गत मंसिर २६ गतेदेखि लगातार बजार बढिरहेको छ।
आज नेप्से परिसूचक ४५.९८ अंकले बढेर २१०६.४८ को विन्दुमा पुगेको छ। चालु आर्थिक वर्षको मौद्रिक नीतिको प्रथम त्रैमासिक समीक्षामार्फत केही लचिलो नीति राष्ट्र बैंकले लिएपछि बजार बढ्न थालेको हो।
लगानीकर्ताको मनोबल बढेसँगै शेयर बजारमा कारोबार रकम पनि बढ्दै गएको छ ।
पछिल्लो ६ दिनको बढाइमा शेयर बजारका लगानीकर्ताको सम्पत्ति ६.५५ प्रतिशतले बढेको छ। गत मंसिर २६ गते बजार पुँजीकरण ३० खर्ब ६१ अर्ब रुपैयाँ रहेको थियो। आज बजार पुँजीकरण बढेर ३२ खर्ब ६१ अर्ब रुपैयाँ पुगेको छ।
यस हिसाबले ६ दिनमा लगानीकर्ताको सम्पत्ति २ खर्ब रुपैयाँले बढेको छ।
