काठमाडौं । बैंकिङ प्रणालीमा ६० खर्ब निक्षेप नाघेको छ।
नेपाल राष्ट्र बैंकको तथ्यांकअनुसार बैंक तथा वित्तीय संस्थाहरुको कुल निक्षेप ६० खर्ब ३ अर्ब रुपैयाँ पुगेको छ। यो तथ्यांक गत मंसिर २८ गतेसम्मको हो। अघिल्लो दिन मंसिर २७ गतेसम्म बैंक तथा वित्तीय संस्थाको कुल निक्षेप ५९ खर्ब ९५ अर्ब रुपैयाँ रहेको थियो। यो १ दिनमा बैंकिङ प्रणालीमा ८ अर्ब रुपैयाँ निक्षेप थपिएको छ।
मंसिर २८ गतेसम्म बैंक तथा वित्तीय संस्थाहरुले ४९ खर्ब ९१ अर्ब रुपैयाँ कर्जा प्रवाह गरेका छन्। जुन अघिल्लो दिनको तुलनामा ३ अर्ब रुपैयाँले बढी हो। मंसिर २७ गतेसम्म बैंक तथा वित्तीय संस्थाहरुको कुल कर्जा प्रवाह ४९ खर्ब ८९ अर्ब रुपैयाँ रहेको थियो।
मंसिर २८ गतेमा बैंकहरुको औसत सीडी रेसियो सामान्य घटेर ८०.३६ प्रतिशत कायम भएको छ। अघिल्लो दिनसम्म औसत सीडी रेसियो ८०.४२ प्रतिशत थियो।
बैंकको अन्तरबैंक ब्याजदर भने २.६२ प्रतिशत रहेको छ।
