बीमा कम्पनीहरुले घरजग्गा, कृषि, पर्यटन, सामूहिक लगानीकोषमा पनि लगानी गर्न पाउँने
बीमा कम्पनीहरुले घरजग्गा व्यवसायमा पनि लगानी गर्न पाउँने भएका छन् । कम्पनीहरुले कूल टेक्निकल रिजर्भको ५ प्रतिशतसम्म घरजग्गा व्यवसायमा लगानी गर्न पाउँने भएका छन् । बीमा समितिले बीमक लगानी सम्बन्धी निर्देशिका २०७५ जारी गर्दै यस्तो व्यवस्था गरेको हो ।
बीमा समितिले जारी गरेको निर्देशिका अनुसार अब देखि कम्पनीहरुले कृषि, पर्यटन तथा जलस्रोतको क्षेत्रमा पनि लगानी गर्न पाउँने छन् । यस्तो क्षेत्रमा कम्पनीहरुले २० प्रतिशतसम्म लगानी गर्न सक्नेछन् । तर, एउटै परियोजनामा लगानी गर्न आवहन गरिएको कुल रकमको १० प्रतिशत भन्दा बढी लगानी गर्न पाईने छैन । साथै यस्तो लगानी गरिने कम्पनी पब्लिक कम्पनी हुनुपर्नेछ । कम्पनीहरुले लगानी गर्नुपूर्व समितिसँग स्वीकृतिल लिनु पर्नेछ ।
बीमा कम्पनीहरुले नागरिक लगानी कोष र म्यूचुअल फण्डमा समेत लगानी गर्न पाउँने भएका छन् । यस्तो क्षेत्रमा कम्पनीहरुले ५ प्रतिशत लगानी गर्न पाउँने व्यवस्था गरिएको छ । कम्पनीहरुले एउटै योजनामा ५ प्रतिशत भन्दा बढी लगानी गर्न पाउँने छैनन् ।
बीमा कम्पनीहरुले पब्लिक कम्पनीको साधारण सेयरमा १० प्रतिशतसम्म लगानी गर्न पाउँने छन् । समितिले जारी गरेको लगानी निर्देशिका अनुसार सेयर लगानी गरिने कम्पनीको चुक्ता पूँजीको ५ प्रतिशत भन्दा बढि हुने गरी लगानी गर्न भने पाईने छैन । त्यस्तै बैक तथा वित्तीय संस्थाको अग्राधिकार सेयरमा २० प्रतिशतसम्म लगानी गर्न सक्नेछन् । यस्तो लगानी कम्पनीको चुक्ता पूँजीको १० प्रतिशत भन्दा बढी हुने गरी लगानी गर्न पाईने छैन । साथै पब्लिक कम्पनीको डिबेञ्चरामा भने २० प्रतिशतसम्म लगनी गर्न सकिनेछ । यस्तो लगानी आवहन गरिएको कुल रकमको १० प्रतिशत भन्दा बढी हुनुहुँदैन । यस्तो क्षेत्रमा समितिले तोके भन्दा बढी रकम लगानी गरेमा सोल्भिेन्सी मार्जिनको गणनायोग्य सम्पति मानिने छैन ।
अनिवार्य गरिएका क्षेत्रहरु
बीमा समितिले बाणिज्य बैंकको मुद्धती निक्षेप तथा सरकारको बचतपत्र र ऋणपत्रमा भने अनिवार्य लगानी गर्नुपर्ने व्यवस्था गरेको छ । यस्तो क्षेत्रमा गरिएको लगानीलाई सोल्भिेन्सी मार्जिनको गणनायोग्य सम्पति मानिनेछ ।
निर्देशिका अनुसार कम्पनीहरुले बाणिज्य बैंकको मुद्धति निक्षेपमा ४० प्रतिशतसम्म लगानी गर्न पाउँनेछन् । तर, लगानी गर्ने बैंक स्थापना भएको ५ बर्ष पुरा भएको हुनुपर्नेछ भने ३ बर्षसम्म नाफामा रहेको हुनुपर्नेछ । एउटा बैकमा १५ प्रतिशतसम्म लगानी गर्न सकिनेछ । विकास बैंकको मुद्धती निक्षेपमा २० प्रतिशत र वित्त कम्पनीको मुद्धति निक्षेपमा १० प्रतिशत लगानी गर्न पाईनेछ ।
साथै बीमा कम्पनीहरुले नेपाल सरकार, नेपाल राष्ट्र बैंक, नेपाल सरकारबाट मान्यता प्राप्त बचतपत्र वा ऋणपत्रमा ५ प्रतिशतसम्म लगानी गर्न पाउँने भएका छन् । तर, बचतपत्र तथा ऋणपत्र जारी नभएको अवस्थामा बीम समितिको स्वीकृतिमा बाणिज्य बैक वा पूर्वाधार बैकको मुद्धती निक्षेपमा लगानी गर्न सक्नेछन् ।
