काठमाडौं । बैंकहरुमा गाडी कर्जाको माग बढ्न नसकेको देखिएको छ। नेपाल राष्ट्र बैंकले सार्वजनिक गरेको चालु आर्थिक वर्षको प्रथम त्रैमास (साउन–असोज)सम्मको तथ्यांकले यस्तो देखाएको हो।
तथ्यांकअनुसार समीक्षा अवधिसम्म बैंकहरुबाट १ खर्ब २४ अर्ब ९४ करोड ५१ लाख रुपैयाँ गाडी कर्जा प्रवाह भएको छ। अघिल्लो वर्ष यही अवधिसम्म बैंकबाट १ खर्ब २९ अर्ब ६७ करोड ९८ लाख रुपैयाँ गाडी कर्जा गएको देखिन्छ। अघिल्लो वर्षको तुलनामा गाडी कर्जा ३.६५ प्रतिशतले घटेको छ।
बैंकहरुबाट व्यावसायिक प्रयोजनका लागि जारी गाडी कर्जा घटेको छ भने व्यक्तिगत प्रयोजनका लागि जाने गाडी कर्जा बढेको छ।
व्यावसायिक प्रयोजनका लागि समीक्षासम्म बैंकहरुबाट ८५ अर्ब १० करोड ५७ लाख रुपैयाँ गएको छ। अघिल्लो वर्ष यही अवधिसम्म बैंकहरुले ९४ अर्ब ७६ करोड ४२ लाख रुपैयाँ गाडी कर्जा प्रवाह गरेका थिए। अघिल्लो वर्षको तुलनामा समीक्षा अवधिमा व्यावसायिक प्रयोजनका लागि बैंकहरुबाट गएको गाडी कर्जा १०.१९ प्रतिशतले घटेको छ।
यसैगरी व्यक्तिगत प्रयोजनका लागि बैंकहरुले समीक्षा अवधिसम्म ३९ अर्ब ८३ करोड ९४ लाख रुपैयाँ गाडी कर्जा प्रवाह गरेका छन्। अघिल्लो वर्ष यही अवधिसम्म बैंकहरुबाट ३४ अर्ब ९१ करोड ५६ लाख रुपैयाँ गाडी कर्जा गएको थियो। अघिल्लो वर्षको तुलनामा समीक्षा अवधिमा व्यक्तिगत प्रयोजनका लागि जाने गाडी कर्जा १४.१० प्रतिशतले बढेको छ।
