शकाठमाडौं । जीवन तथा निर्जीवन बीमा कम्पनीहरूले वित्तीय सबलीकरणका लागि पूँजी वृद्धिलाई प्राथमिकतामा पारेपछि एक वर्षको अवधिमै चुक्ता पूँजीवापत साढे ११ अर्ब रूपैयाँ थपिएको छ।
नेपाल बीमा प्राधिकरणका अनुसार, जीवन र निर्जीवन बीमक समेतका शेयरधनीले बोनश शेयर र हकप्रद शेयरमार्फत कुल ११ अर्ब ५६ करोड रूपैयाँ थपेका हुन् । यो मध्ये जीवन बीमकको शेयरधनीले रू. १० अर्ब १ करोड र निर्जीवन बीमकको शेयरधनीले रू. १ अर्ब ५५ करोड थप पूँजी लगानी गरेका हुन् । यो रकम शेयरको अंकित मूल्यका आधारमा गणना गरिएको हो।
चुक्ता पूँजीको वृद्धि दर र रकम दुबैको आधारमा जीवन बीमकका लगानीकर्ता अघि देखिएका छन् । आकार निर्जीवन बीमकको तुलनामा जीवन बीमकको दोब्बर भएकाले यस्तो देखिएको हो।
नेपाल बीमा प्राधिकरणले जीवन बीमकको लागी रू ५ अर्ब, निर्जीवन बीमकको लागि रू २.५० अर्ब, लघु बीमकको लागि रू ७५ करोड न्यूनत्तम चुक्ता पूँजी कायम गरेको छ।
प्राधिकरणका अनुसार, अघिल्लो आ. व. २०८०।८१ मा जीवन बीमकको चुक्ता पूँजी रू. ६० अर्ब ८ करोड रहेकोमा गत आ. व. मा १६.६६ प्रतिशत वृद्धि भएर रू. ७० अर्ब ९ करोड रूपैयाँ पुगेको छ। यो अवधिमा निर्जीवन बीमकको चुक्ता पूँजी रू. २७ अर्ब ८० करोडबाट ५.५८ प्रतिशत वृद्धि भएर रू. २९ अर्ब ३५ करोड पुगेको छ।
