नेपाल लाईफ इन्स्योरेन्सले १५ दशमलव ७८ प्रतिशत नगद लाभांश प्रस्ताव पारित गर्न मंसिर ८ गते २२औं वार्षिक साधारण सभा गर्ने भएको छ।
काठमाडौं । नेपाल लाईफ इन्स्योरेन्सले ६०ः४० को अनुपातमा रहेको शेयर संरचनालाई ५१ः४९ प्रतिशतमा झारेको छ । यसको अर्थ पहिले कूल चुक्ता पूँजीमध्ये ६० प्रतिशत संंस्थापक शेयरधनीको लगानी थियो भने बाँकी साधारण शेयरधनीको । अहिले नयाँ पूँजी संरचना अनुसार संस्थापकको शेयर लगानी ५१ प्रतिशतमा सीमित भएको छ । बाँकी ९ प्रतिशतवापतको शेयर संस्थापकबाट साधारण शेयरमा रुपान्तर गर्दा संस्थापकले दोश्रो बजारबाट मनग्ये आर्जन गर्ने अवसर पाए ।
नेपाल लाईफ इन्स्योरेन्समा चुक्ता पूँजीको झण्डै आधा हिस्सा सर्वसाधारणले लगानी गरे पनि संचालक समितिमा प्रतिनिधित्वमा झेल भएको छ । अझै पनि पुरानो शेयर संरचना बमोजिम नै संचालक समितिमा संस्थापकहरुकै बाहुल्यता रहेको छ । एकजना स्वतन्त्र संचालक सहित सात सदस्यीय संचालक समिति सदस्यमध्ये चारजना संस्थापक समूहको प्रतिनिधित्व गरेका छन् । संस्थापकहरुबाट गोविन्द लाल संघाई, कमलेश कुमार अग्रवाल, विवेक अग्रवाल र शक्ति कुमार गोल्यान रहेका छन् । सर्वसाधारण शेयरधनीको तर्फबाट बिमल प्रसाद ढकाल, कृष्ण राज लामिछाने र विज्ञ संचालकको रुपमा पारुल ढकाल रहेका छन् ।
शेयर संरचनामा भएको परिवर्तनसँगै सात सदस्यीय संचालक समितिमा संस्थापक र साधारण शेयरधनीको तर्फबाट संचालक समितिमा बराबर अर्थात् ३–३ जनाको प्रतिनिधित्व हुनुपर्छ ।
२२औं वार्षिक साधारण सभा मंसिर ८ गते
नेपाल लाइफ इन्स्योरेन्स कम्पनीले २२औं वार्षिक साधारण सभा मंसिर ८ गते गर्ने भएको छ । कम्पनीको कार्तिक ४ गते बसेको संचालक समितिको बैठकले उक्त सभाको मिति तय गरेको हो । सभा बिहान ९ बजे होटल भिष्वा विरगंजमा हुने कम्पनीले जनाएको छ ।
सभामा कम्पनीले संचालक समितिको तर्फबाट अध्यक्षले प्रस्तुत गर्ने आर्थिक वर्ष २०७७/ ७८ को वार्षिक कार्य प्रगति विवरण पारित गर्ने, लेखापरीक्षकको प्रतिवेदन सहित आर्थिक वर्ष २०७७/ ७८ को नाफा नोक्सान, हिसाव, नगद प्रवाह,वित्तीय विवरण लगायतका विवरणमाथि छलफल गरी पारित गर्नेछ ।
त्यस्तै, सभाले कम्पनीको लेखापरीक्षण समितिले गरेको सिफारिस बमोजिम आर्थिक वर्ष २०७८ /७९ को लागि लेखापरीक्षक नियुक्ति गर्ने, निजको पारीश्रमिक तोक्ने प्रस्ताव पारित गर्नेछ । कम्पनीले गत आर्थिक वर्षको नाफाबाट प्रस्ताव गरेको हाल कायम चुक्ता पूँजीबाट आफ्ना शेयरधनीलाई १५ दशमलव ७८ प्रतिशत नगद लाभांश प्रस्ताव गरेको छ । सभाले उक्त प्रस्तावलाई अनुमोदन गर्नेछ ।
त्यस्तै, सभामा संचालक समितिले गरेको स्वतन्त्र संचालकको नियुक्तिलाई अनुमोदन गर्नेछ । कम्पनीले लाभांश वितरण तथा सभा प्रयोजनका लागि कार्तिक १८ गते एक दिन बुक क्लोज गर्ने निर्णय गरेको छ । त्यसकाण कार्तिक १७ गते नेप्सेमा कारोबार भइ कायम शेयरधनीले लाभांश प्राप्त गर्न तथा सभामा भाग लिन पाउनेछन् ।
…… र यो पनि हेर्नुहोस
नेपाल लाईफको पूँजी संरचना परिवर्तन भएपनि बोर्डमा संस्थापककै बाहुल्यता
