काठमाडौं । नेपालीहरुको राष्ट्रिय पर्व दशैंको समयमा बैंकहरुमा पैसा (तरलता) को चर्को अभाव भएको छ । बैंकहरुमा पैसाको हाहाकार मच्चिएपछि नेपाल राष्ट्र बैंकले मुद्रा सन्तुलन गर्न अपनाइने औजार प्रयोग गर्दै १५ अर्ब रुपैयाँ बजारमा पठाउने भएको छ ।
सर्वसधारणले अत्याधिक मात्रामा निक्षेप झिकेपछि बैंकहरुमा चर्को मात्रामा तरलता अभाव भएको हो । बैंकहरुमा निक्षेप फिर्ता गर्नै समस्या परेपछि अन्तर बैंक सापटीमा ब्याजदर उच्च हुन पुगेको छ । अन्तर बैंक सापटीमा ब्याजदर पाँच प्रतिशतभन्दा माथि पुगेपछि नेपाल राष्ट्र बैंकले आजै रिपोमार्फत १५ अर्ब रुपैयाँ बजारमा पठाउन लागेको हो । केन्द्रीय बैंकले दशैंमा निकालिएको पैसा पुनः बैंकमा फर्कने विश्वासका साथ एक हप्ताको लागि १५ अर्ब रुपैयाँ बजारमा पठाउन लागेको जनाएको छ ।
