काठमाडौं । सरकारले दसैं–तिहारसहित चाडपर्व लक्षित गरेर बिहीबार (असोज ३ गते) देखि सुपथ पसल सञ्चालनमा ल्याएको छ।
उद्योग, वाणिज्य तथा आपूर्ति मन्त्रालयले गत भदौ २३ गते चाडपर्व लक्षित सुपथ पसल सञ्चालन गर्ने निर्णय गरेको थियो । सोही निर्णयबमोजिम खाद्य व्यवस्था तथा व्यापार कम्पनीले ४२ जिल्लाका ६३ स्थानमा सुपथ पसल सञ्चालनमा ल्याएको हो।
कम्पनीका अनुसार काठमाडौं उपत्यकाका चार स्थान सुपथ पसल सञ्चालनमा ल्याइएको छ। थापाथली, रामशाहपथ, नख्खु र सूर्यविनायकमा सुपथ पसल खोलिएको कम्पनीले जनाएको छ।
उपभोक्ताले सुपथ पसलमा चामल र दालमा बजारमूल्यभन्दा किलोको ५ रुपैयाँ छुट पाउनेछन्। प्रतिलिटर खाने तेलमा ५ रुपैयाँ तथा गेडागुडी, पिठो, मैदा, चिउरा, चिनी, क्वाँटीमा ७ रुपैयाँ छुट दिइएको कम्पनीले जनाएको छ। त्यस्तै प्रतिकिलो कर्णाली सिमी, गेडागुडी, फापर दाना, चिनो, कागुनो, उवा र जुम्ली मार्सीमा पनि ७ रुपैयाँ छुट दिइएको छ।
यसैगरी डीडीसी घिउमा प्रतिकिलोमा १० रुपैयाँ छुट दिइएको छ।
सुपथ पसल आउँदो माघ २ गतेसम्म सञ्चालन गरिने कम्पनीले जनाएको छ। सुपथ पसल सञ्चालनका लागि सरकारले ३ करोड रुपैयाँ विनियोजन गरेको छ।
कम्पनीले दसैँका लागि मकवानपुर, तुलसीपुरलगायत स्थानबाट खसी–बोका १ हजार ५०० वटा तथा मुस्ताङबाट च्यांग्रा ३०० वटा बेच्ने निर्णय गरेको छ। घटस्थापनाको आसपासदेखि कम्तीमा नवमीको दिनसम्म खसी, बोका र च्यांग्रा थापाथलीस्थित कम्पनीको प्रादेशिक कार्यालयमात्र बिक्री गरिनेछ।
खसी, बोका र च्यांग्रामा प्रतिकिलो १० रुपैयाँ छुट दिइने कम्पनीले जनाएको छ।
