घोडिघोडा लघुवित्त वित्तीय संस्थाको आइपीओमा आवेदन दिने आज अन्तिम दिन हो । कम्पनीले असार २० गते देखि प्रतिकित्ता १०० रुपैयाँ दरले १ लाख ३२ हजार ६०० कित्ता आइपीओ खुला गरेको हो ।
यसमध्ये ०.५ प्रतिशत (१ हजार ३८० कित्ता) कम्पनीका कर्मचारी र ५ प्रतिशत (६ हजार ६३० कित्ता) सेयर सामूहिक लगानी कोषहरुलाई छुट्याइएको छ । बाँकी १ लाख २४ हजार ५ सय ९० कित्ता सेयरमा सर्वसाधारणले आवेदन दिन सक्नेछन् । लगानीकर्ताले सी–आस्वाको माध्यमबाट आवेदन दिन सक्नेछन् ।
सोमबार साझँ सम्म २ लाख १३ हजार ८ सय ३७ जनाले ३७ लाख ५१ हजार २५० कित्ताका लागि आवेदन दिएका छन् । यो आवेदन माग भन्दा ३०.१० गुणा बढी हो ।
आइपीओमा माग भन्दा बढी आवेदन परिसकेकाले मंगलबार नै बिक्री बन्द गर्न लागिएको बिक्री प्रबन्धक प्रभु क्यापिटलले जनाएको छ ।
आइपीओबाट जम्मा भएको रकममध्ये ५० लाख रुपैयाँ कृषि क्षेत्र, ३२ लाख ६० हजार रुपैयाँ व्यापार व्यवसाय र ५० लाख रुपैयाँ लघु उद्यम कर्जामा उपयोग गरिने कम्पनीले जनाएको छ । घोडिघोडाले आइपीओ बिक्रीपछि चुक्ता पुँजी २ करोड ७६ लाख २५ हजार रुपैयाँ पुर्याउने छ ।
