काठमाडौं । बीमा समितिले एभरेष्ट इन्स्योरेन्स कम्पनीका प्रमुख कार्यकारी अधिकृत कमल गौतमको पुनर्नियुक्तिको प्रस्तावलाई स्वीकृति दिएको छ । केहि दिन अगाडि कम्पनीको सञ्चालक समितिले उनलाई थप एक कार्यकालको लागि पुनर्नियुक्ति गर्ने निर्णय गरेको थियो ।
सत्र्चालक समितिको उक्त प्रस्ताव बीमा समितिबाट स्वीकृति भए सँगै उनको पुनर्नियुक्ति पक्का भएको छ । कम्पनीले गौतमलाई २०७४ असारमा ४ वर्षको लागि प्रमुख कार्यकारी अधिकृतमा नियुक्त गरेको थियो ।
नेपाल ग्रिन्डलैज बैंकबाट प्रोफेसनल बैंकिङ्ग क्यारियर सुरु गरी हिमालयन, एनआईसी एसिया, एनबि, सनराबइज बैंक हुँदै इन्फ्रान्स्टक्चर डेभलपमेन्ट बैंकको प्रमुख कार्यकारी अधिकृत पदमा रही गौतमले २६ वर्षको बैंकिङ अनुभव संगालेका छन् । इन्फ्रास्ट्रक्चर डेभलपमेन्ट बैंक एनसीसीमा गाभिए पश्चात नायव महाप्रवन्धकको जिम्मेवारी सम्हालेका गौतमले एभरेष्टमा आउनका लागि राजिनामा दिएका थिए ।
समस्याग्रस्त संस्थालाई सुधार गर्न अनुभवी गौतम निर्णय एवं व्यवस्थापकिय क्षमतामा अव्वल मानिन्छन् । समस्या ग्रस्त अवस्थाबाट गुज्रिएको एभरेष्ट इन्स्योरेन्सलाई पनि गौतमले चार वर्षे कार्यकालमा प्रतिस्पर्धी कम्पनीको रुपमा उभ्याएका छन् । बीमा समितिको पूँजी बृद्धि योजनालाई पुरा गर्न सफल गौतम बीमा क्षेत्रमा पनि दक्ष ठहरिएका छन् । बैंक र बीमा क्षेत्रमा तीन दशकको अनुभव सम्हालेका गौतमले त्रिभुवन विश्वविद्यालयवाट व्यवस्थापन विषयमा स्नातकोत्तर गरेका छन् ।
