काठमाडौं । चालु आर्थिक वर्ष २०८२।८३ को ८ महिना फागुनसम्म बैंकहरुबाट १ खर्ब ३९ अर्ब रुपैयाँ बढी गाडी कर्जा प्रवाह भएको छ।
नेपाल राष्ट्र बैंकले सार्वजनिक गरेको तथ्यांकअनुसार चालु वर्षको फागुनसम्म १ खर्ब ३९ अर्ब ७८ करोड रुपैयाँ गाडी कर्जा प्रवाह भएको छ। अघिल्लो वर्ष २०८१।८२ को फागुनसम्म बैंकहरुबाट १ खर्ब २९ अर्ब ९५ करोड रुपैयाँ गाडी कर्जा प्रवाह भएको थियो। अघिल्लो वर्षको तुलनामा समीक्षा अवधिमा गाडी कर्जा प्रवाह ७.५७ प्रतिशतले बढेको छ।
समीक्षा अवधिसम्म बैंकहरुले व्यावसायिक गाडी कर्जा शीर्षकमा ९४ अर्ब ९८ करोड रुपैयाँ दिएका छन्। अघिल्लो वर्ष यही अवधिसम्म बैंकहरुले यो शीर्षकमा ८७ अर्ब ६५ करोड रुपैयाँ कर्जा प्रवाह गरेका थिए। अघिल्लो वर्षको तुलनामा समीक्षा अवधिमा कर्जा प्रवाह ८.३७ प्रतिशतले बढेको छ।
यसैगरी व्यक्तिगत गाडी कर्जामा बैंकहरुले ४४ अर्ब ७९ करोड रुपैयाँ दिएका छन्। अघिल्लो वर्ष यो शीर्षकमा बैंकहरुले ४२ अर्ब ३० करोड रुपैयाँ कर्जा प्रवाह गरेका थिए। अघिल्लो वर्षको तुलनामा समीक्षा अवधिमा बैंकहरुको कर्जा प्रवाह ५.८९ प्रतिशतले बढेको छ।
