काठमाडौं । कम्बोडिया बीमा नियामक (आईआरसी) ले अनिवार्य बीमाको नियम कडाइका साथ कार्यान्वयन र जनचेतनाका लागि आह्वान गरेको छ।
खमेर टाइम्समा प्रकाशित समाचारअनुसार यो कदम सामाजिक सुरक्षा बढाउन र आर्थिक लचिलोपनलाई समर्थन गर्ने नियामकको प्रयासको एउटा हिस्सा हो। बीमा नियामकका महानिर्देशक बो चानफिराउको अध्यक्षतामा भएको अनिवार्य बीमासम्बन्धी सेमिनारमा यो आह्वान गरिएको थियो।
चानफिराउका अनुसार कम्बोडियाको बीमा कानुनले तीन प्रकारका अनिवार्य बीमा पहिचान गर्दछ। पहिलो व्यावसायिक सवारीसाधनका लागि मोटर तेस्रो पक्ष दायित्व बीमा, दोस्रो भूमि, पानी, हावा र रेलमा यातायात सञ्चालकहरुका लागि यात्रु दायित्व बीमा र तेस्रो शारीरिक चोटपटक वा सम्पत्ति क्षतिका लागि पीडितलाई क्षतिपूर्ति दिन निर्माणस्थल दायित्व बीमाको अनिवार्य रहेको छ।
चानफिराउले व्यवसाय मालिकहरुमा कम जागरुकता, अपर्याप्त पहुँच र केही सक्षम अधिकारीहरुमा स्पष्ट बुझाइको अभावका कारण अनुपालन अझै पनि सीमित रहेको उल्लेख गरे। ‘कानुन प्रवर्तनलाई बलियो बनाउन बीमा नियामकले बीमा क्षेत्र २०२१–२०३० को विकास योजनाअन्तर्गत अनिवार्य बीमाको वृद्धिलाई प्राथमिकता दिएको छ’, उनले भने। –एजेन्सी
