काठमाडौं । नेपाल बीमा प्राधिकरणले बीमा दाबी भुक्तानीमा कुनै समस्या भएमा उजुरी दिन आह्वान गरेको छ।
प्राधिकरणले आज एक सूचना जारी गर्दै यस्तो आह्वान गरेको हो। ‘बीमाको दायित्व निर्धारण एवं दाबी भुक्तानी गर्ने क्रममा केही बीमक, बीमकका कर्मचारी तथा सर्भेयरले बीमासम्बन्धी प्रचलित कानुन, नियामकीय व्यवस्था तथा व्यावसायिक आचारसंहिताविपरीत कार्य गरेको भन्ने सम्बन्धमा प्राधिकरणमा विभिन्न गुनासा प्राप्त भइरहेका छन्’, सूचनामा भनिएको छ, ‘यस सन्दर्भमा यदि कुनै बीमक, बीमकका कर्मचारी, बीमा सर्भेयर वा अन्य कुनै पक्षले दुखः दिएमा, गलत विवरण तयार गरेको, तथ्य लुकाएको वा तोडमोड गरेको, पक्षपातपूर्ण मूल्यांकन गरेको, अनुचित लाभ लिएको वा अन्य कुनै कानुनविपरीत कार्य गरेको भए त्यस्तो कार्यमा संलग्न व्यक्तिका विरुद्ध बीमा ऐन, २०७९ बमोजिम कारबाहीका लागि सम्बन्धित सबै सरोकारवालालाई प्रमाणसहित उजुरी पेस गर्न आग्रह छ।’
उजुरी पेस गर्दा संलग्न गर्नुपर्ने विवरणहरु
- उजुरीकर्ताको नाम, ठेगाना तथा सम्पर्क नम्बर
- सम्बन्धित बीमा कम्पनीको नाम
- समस्याको व्यहोरा
- बीमा दाबी नम्बर तथा बीमालेख नम्बर
- पुष्टि हुने कागजात, फोटो, भिडियो वा अन्य प्रमाण
उजुरी पेस गर्ने माध्यम
- नेपाल बीमा प्राधिकरणको दर्ता शाखामा प्रत्यक्ष।
- प्रत्यक्ष रुपमा उपस्थित भई ई–मेलः [email protected]: [email protected]
- हुलाकमार्फतः नेपाल बीमा प्राधिकरणको केन्द्रीय कार्यालय ललितपुर म. न.पा. १०, कुपण्डोल, ललितपुर।
प्राप्त उजुरी तथा प्रमाणको गोपनीयता कायम राखी बीमा ऐन, २०७९ तथा अन्य प्रचलित कानुनबमोजिम अनुसन्धान गरी आवश्यक कारबाही प्रक्रिया अगाडि बढाइने प्राधिकरणले जनाएको छ।
