काठमाडौं । धुलिखेल अस्पतालले आउँदो भदौ १ गतेबाट पुनः स्वास्थ्य बीमा सेवा प्रदान गर्ने भएको छ।
स्वास्थ्य बीमा बोर्डबाट निर्धारित स्वास्थ्य बीमा थैलीमा भएको आर्थिक तथा प्राविधिक सीमितका कारण धुलिखेल अस्पतालले स्वास्थ्य बीमा सेवा स्थगित गरेको छ। तर, बीमा बोर्डले गत असार ३० गते परिमार्जित गरेको तथा सहजता र भुक्तानीको सुनिश्चिततामा आश्वासन प्राप्त भई आएकोले पुनः भदौ १ गतेबाट हाल बहिरंग सेवा (ओपीडी सर्भिस)मा स्वास्थ्य बीमा कार्यक्रम पुनः सुरु गरिने जानकारी अस्पतालले गराएको हो।
यो स्वास्थ्य बीमा सेवा सरकारी निकाय बिदा हुने दिन आइतबारलगायत सार्वजनिक बिदाका दिन भने बन्द रहने अस्पतालले स्पष्ट पारेको छ। ‘स्वास्थ्य बीमा सेवा लिन आउँदा यसअघिको साविकको प्रथम सेवा विन्दुबाट जारी गरिएको रिफरल पुर्जी अनिवार्य रुपमा साथमा ल्याउनुपर्नेछ’, अस्पतालले जारी गरेको सूचनामा भनिएको छ।
