काठमाडौं । दोर्दी खोला जलविद्युत कम्पनीको अवितरित हकप्रद शेयरमा बोलपत्र पेश गर्ने समय थप भएको छ । कम्पनीले जेठ ११ गतेबाट करिब साढे १९ लाख कित्ता अवितरित हकप्रद शेयर बिक्रीमा ल्याएको थियो । सो शेयरमा बोलपत्र पेश गर्ने आज जेठ १९ गते अन्तिम दिन भएपनि शेयर खरिदका लागि आवेदन नपरेकाले समय थप गरेको हो ।
कम्पनीले चुक्तापुँजी १ः१ अनुपातमा १०० रुपैयाँ दरका कुल १ करोड ५ लाख ४२ हजार ६०४ कित्ता हकप्रद शेयर बिक्रीमा राखिएको थियो। त्यतिबेला बिक्री हुन बाँकी १९ लाख ४६ हजार ६७६ कित्ता शेयर लिलामी प्रक्रियामार्फत बिक्रीमा राखिएको हो।
बिक्रीमा राखिएको कुल शेयरमध्ये संस्थापक समूहको १२ लाख ८५ हजार ४१ कित्ता र सर्वसाधारण समूहको १ लाख ६५ हजार ९५६ कित्ता शेयर छन्। यी दुवै समूहको लकइन आउँदो असार ७ गते सकिँदैछ। त्यसैगरी सर्वसाधारण समूहकै लकइनमा नरहेको ४ लाख ९५ हजार ६७९ कित्ता शेयर पनि बिक्रीमा राखिएको छ।
बिक्रीमा राखिएको शेयरमा जोकोही व्यक्ति तथा संस्थाले शेयर खरिदका लागि बोलपत्र पेस गर्न सक्नेछन्। लगानीकर्ताले न्यूनतम १०० कित्ता र अधिकतममा सम्पूर्ण कित्ता खरिद गर्न बोलपत्र पेस गर्न सक्नेछन्।
लगानीकर्ताले काठमाडौंको नक्सालमा रहेको सानिमा क्यापिटलका साथै सानिमा बैंकका शाखाहरु विराटनगर, बिर्तामोड, वीरगन्ज, जनकपुर, भरतपुर, हेटौँडा, पोखरा, बुटवल, घोराही, नेपालगन्ज, वीरेन्द्रनगर, धनगढी, महेन्द्रनगर र गरिमा विकास बैंकको बागलुङ शाखामा बोलपत्र पेस गर्न सक्नेछन्।
