काठमाडौं । भारतको निजी क्षेत्र प्रवर्द्धित वायू सेवा प्रदायक, टाटा समूह अन्तर्गतको एयर इन्डिया (एआई) को पूर्ण स्वामित्वमा रहेको सहायक कम्पनी एयर इन्डिया एक्सप्रेस आउँदो आर्थिक वर्ष २०२५-२६ मा ३ करोड यात्रुलाई उडान सेवा दिने लक्ष्य लिएको छ।
एयर इण्डियाले लिएको यात्रु संख्या लक्ष्य भारतको कुल जनसंख्याको जम्मा २.०९ प्रतिशत मात्र हो। सन् २०२३ को गणना अनुसार १ अर्ब ४३ करोड जनसंख्या भएको भारत विश्वमै सर्वाधिक जनसंख्या भएको देश हो।
यसले चालू आर्थिक वर्ष २०२४-२५ मा २ करोड यात्रु बोक्ने लक्ष्य पुरा गरेको छ। टाटा समूहले वायू सेवा सञ्चालनका बहुआयामिक आयामहरू समेट्ने आक्रामक विस्तार रणनीति कार्यान्वयन गरिरहेको छ।
भारतमा प्रत्येक वर्षको १ अप्रिल देखि आगामी वर्षको मार्च मसान्तसम्मको अवधिलाई आर्थिक वर्षको १२ महिनाका रूपमा अभ्यास गरिंदै आएको छ।
एयर इन्डिया एक्सप्रेसले हाल ६७ वटा बोइङ ७३७ र ३६ वटा ए३२० मोडलको एयर बस सहित १०३ विमानहरूको बेडाको साथ एक बलियो परिचालन ढाँचा कायम राखेको छ। यो विविध विमानले एयरलाइनलाई दैनिक ४८५ उडानहरू सञ्चालन गर्न सक्षम बनाएको छ।
एयर इन्डिया एक्सप्रेसले २०२६-२७ को पहिलो त्रैमासिकसम्ममा पुराना जहाजको सबै इकोनोमिक क्लास सिटहरूमा आन्तरिक सज्जा र यात्रुको सिट, आराम कक्ष लगायतमा परिवर्तन गर्दै सुविधा थप्ने लक्ष्य लिएको छ। यो रणनीतिक कदमले यात्रु अनुभवलाई सुव्यवस्थित गर्ने र सञ्चालन दक्षतालाई अनुकूलन गर्ने लक्ष्य राखेको छ।
एयरलाइन्सले आफ्नो क्षेत्रीय सञ्जाललाई उल्लेखनीय रूपमा विस्तार गर्ने तयारी समे गरेको छ। यस योजनामा बैङ्गलुरु अन्तर्राष्ट्रिय विमानस्थलबाट हैदराबादको लागि सिधा उडान,बङ्गलुरुबाट चेन्नईको लागि सिधा उडानहरू सञ्चालन गर्नेछन् । यी रुटहरूमा १८६-सिटे बोइङ विमानद्वारा सेवा दिइनेछ।
यसबाहेक एयर इण्डिया एक्सप्रेसले सस्तो हवाई उडान सेवा प्रदायक विदेशी कम्पनीसँग सहकार्य गर्ने योजना समेत सार्वजनिक गरेको छ।एभिएशन एटुजेटका अनुसार , एयर इन्डिया एक्सप्रेसको विस्तार रणनीतिको आधारशिलामा विदेशी सस्ता वायू सेवा प्रदायकसँग भर्चुअल इन्टरलाइन साझेदारी विकास गर्नु समावेश छ। ‘एआइएक्स कनेक्ट’ प्लेटफर्ममार्फत एयर इण्डियाका यात्रुले साझेदार वायू सेवा प्रदायकको यात्रा कार्यक्रमको समेत टिकट सहजरूपमा खरिद गर्न सक्नेछन् ।
हाल, एयरलाइनले यस नेटवर्कलाई थप विस्तार गर्ने योजनासहित छ वटा यस्ता साझेदारीहरू स्थापना गरेको छ।
