काठमाडौं । बीसाैं महिला राष्ट्रिय कबड्डी प्रतियोगिताका उत्कृष्ट खेलाडीलाई पुरस्कार सहित सम्मान गरिएको छ। अखिल नेपाल कबड्डी संघको आयोजनामा भएको प्रतियोगितामा उत्कृष्ट प्रदर्शन गर्न सफल दुई खेलाडीलाई सम्मानका साथै टेलिभिजन सेट पुरस्कार वितरण गरिएको हो।
बेष्ट रेडर नेपाल पुलिसकी मानमती विष्ट र वेष्ट डिफेन्डर एपिएफकी जयन्ती बडुलाई सम्मान सहित एक एक थान ४३ इन्चको टेलिभिजन सेट पुरस्कार स्वरूप वितरण गरिएको हो । उत्कृष्ट खेलाडीका लागि नेशनल लाइफ इन्स्योरेन्सबाट कोर्ट अफ द टेबलका लागि योग्य भएका अभिकर्ता जीवन कुमार केसीले टेलिभिजन सेट उपलब्ध गराएका हुन् ।
प्रतियोगिताको विजेता एपीएफले दुई लाख रूपैयाँ, आर्मीले एक लाख रूपैयाँ र सेमिफाइनलमा पराजित भएका पुलिस र सुदूरपश्चिम प्रदेशले समान ५० हजार रुपैयाँ नगद पुरस्कार पाएका छन्। विजेतालाई राष्ट्रिय खेलकुद परिषद् (राखेप)का सदस्य सचिव टंकलाल घिसिङ र अखिल नेपाल कबड्डी संघका महासचिव अरविन्द झालगायतका अन्य पदाधिकारीलगायतले पुरस्कृत गरेका थिए।
यस प्रतियोगितामा तीन विभागीय टोली र सात प्रदेशले प्रतिस्पर्धा गरेका थिए। प्रतियोगिताबाट आगामी असार महिनामा हुने कबड्डी प्रतियोगिताको विश्वकपका लागि खेलाडी छनोट गरिने भएको छ।
