काठमाडौं । कोरोना बीमाको दावी भुक्तानीको चाप जीवन बीमा कम्पनीहरुमा पनि पर्ने देखिएको छ । एक करोड रुपैयाँ जीवन बीमा गरेको एक व्यवसायीको बीमा पोलिसी खरिद गरेको २६ दिनमा कोरोना भाइरसबाट मृत्यु भएको छ ।
नवलपरासीमा ब्लक उद्योग सञ्चालन गर्दै आएका ३८ बर्षिय सुवासचन्द्र गिरीले एलआईसी नेपालमा एक करोड रुपैयाँको जीवन बीमा गरेका थिए । गत साउन ४ गते एलआईसी नेपालकी सम्राट एजेन्सी म्यानेजर प्रभा ज्ञवालीमार्फत जीवन बीमा गराएका गिरीले जम्मा एक किस्ता मात्रै भुक्तानी गरेका थिए । उनलाई साउनको अन्तिम साता कोरोना भाइरस पोजेटिभ देखियो र भदौं १ गते मृत्यु भयो ।
उनको मृत्युपछि एजेन्सी म्यानेजरले निकै महेनत गरेर कागजात पूरा गरिन् र गत असोज १७ गते एलआईसी नेपालको केन्द्रीय कार्यालयमा फाइल पेश गरिन् । एलआईसी नेपालको केन्द्रीय कार्यालयले यही असोज २१ गते नै एक करोड रुपैयाँको चेक जारी गरेको छ । नेपाल एसबीआई बैंकको एक करोड रुपैयाँ चेक मृतकका हकवाला अनिता देवी गिरीलाई सोमबार एक कार्यक्रम गरी वितरण गर्न लागिएको एलआईसी नेपाल नवलपरासी शाखाले जनाएको छ ।
