काठमाडौं । कोरोना महामारीकै समयमा शेयर बजारमा कारोबारमा उछाल आएको छ । साताको चौथौ दिन नेप्से २५ दशमलव ५८ अंकले बढेर १५१० दशमलव ५७ को विन्दुमा कायम भएको छ । कोरोना महामारीका कारण राजधानी उपत्यकाका निषेधाज्ञाका बीच ऐतिहासिक कारोबार भएको हो । सर्वसाधारणहरुले घरैबाट अनलाईनमार्फत कारोबार गरी चार अर्ब कारोबार नाघेको सम्भवतः पहिलो पटक हो ।
आज १ सय ८६ कम्पनीको ९६ लाख ८६ हजार ९ कित्ता शेयर किनबेच हुँदा ४ अर्ब १८ करोड रुपैयाँको कारोबार भएको छ ।
निर्जिवन र जीवन बीमा क्षेत्रको उपसूचकमा हरियाली छाएको छ । सबैभन्दा धेरै नेपाल रि इन्योरेन्सको ६७ करोड ४२ लाख रुपैयाँ बराबरको कारोबार भएको छ । त्यस्तै, शिखर इन्स्योरेन्सको १७ करोड ७५ लाख रुपैयाँको कारोबार भएको छ ।
वाणिज्य बैंक समूहको सूचकमा पनि सुधार देखिएको छ । दर्जन भन्दा बढीको कम्पनीको भाउ १० प्रतिशतले बढेर सर्किट लागेको छ । सर्किट लाग्ने अधिकांश हाइड्रोपावर कम्पनीहरु नै रहेका छन् ।
प्रभु इन्स्योरेन्सका लगानीकर्ताले ४ दशमलव ४१ प्रतिशतका दरले गुमाएको छ भने प्रुडेन्सियल इन्स्योरेन्सका लगानीकर्ताले ४ दशमलव ०१ प्रतिशतका दरले गुमाएका छन् ।
