काठमाडौं । आर्थिक वर्ष २०७६/७७ मा विप्रेषण आप्रवाहमा ० दशमलव ५ प्रतिशतले घटेर ८७५ अर्ब ३ करोड रुपैयाँमा सिमित भएको छ । राष्ट्र बैंकद्धारा जारी बार्षिक प्रतिवेदनले यस्तो देखाएको हो ।
अघिल्लो आर्थिक वर्षको सोहि अवधिमा विप्रेषण आप्रवाह १६ दशमलव ५ प्रतिशतले बढेको थियो । अमेरिकी डलरमा विप्रेषण आप्रवाह ३ दशमलव ३ प्रतिशतले घटेको छ । अघिल्लो वर्ष यस्तो आप्रवाह ७ दशमलव ८ प्रतिशतले बढेको थियो ।
आर्थिक वर्ष २०७६/७७ मा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या २० दशमलव ५ प्रतिशतले घटेको छ । अघिल्लो वर्ष यस्तो संख्या ३२ दशमलव ६ प्रतिशतले घटेको थियो । वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा वर्षमा ३४ दशमलव ७ प्रतिशतले घटेको छ । अघिल्लो वर्ष यस्तो संख्या ५ दशमलव ४ प्रतिशतले बढेको थियो ।
आर्थिक वर्ष २०७६/७७ मा खुद ट्रान्सफर आयमा १ दशमलव ३ प्रतिशतले कमी आई ९८२ अर्ब २२ करोड रुपैयाँमा कायम भएको छ । अघिल्लो वर्ष यस्तो आय १५ प्रतिशतले बढेको थियो ।
