काठमाडौं । सरकारले कोरोना महामारीबाट थला परेको अर्थतन्त्रलाई उकास्न सघन खेती प्रणाली लागू गर्ने घोषणा गरेको छ । राष्ट्रपति विद्यादेवी भण्डारीले आज संघीय संसदमार्फत आगामी वर्ष जमिन बाँझो रहन नदिइने र कृषि उत्पादन बृद्धिका लागि सघन खेती प्रणाली लागू गरिने सरकारी योजना घोषणा गरेकी छिन् ।
त्यसको लागि सरकारले तीन रणनीतिमा जोड दिइने राष्ट्रपति भण्डारीले घोषणा गरेकी छिन् । आधुनिकीकरण, यान्त्रिकरण र विशिष्टीकरण नेपाल सरकारको आगामी वर्षको सघन खेती प्रणालीमार्फत कृषि उत्पादन बृद्धि गरिने मुख्य रणनीति रहनेछन् ।
सरकारले आगामी वर्ष मौलिक खाद्यान्न, फलफूल, पशुपालनको पञ्जीकरण गरी अनुसन्धान तथा प्रबद्र्धन गरिनेछ । किसानको सूचिकरण गरिनेछ । कृषि तथा कृषि जन्य उद्यमलाई रोजगारमुखी उद्यमको रुपमा विकास गर्नेछ । यसलाई प्रमुख कार्यक्रमको रुपमा देशैभरि विस्तार गरिनेछ । एक स्थानमा एउटै बालीको खेती गरी कृषि उत्पादन बृद्धि गरिनेछ । कृषि उत्पादनको निर्यातमा जोड दिइनेछ । ठूलो परिमाणमा कृषि उत्पादन गर्ने कार्यान्वयनमा ल्याउनेछ ।
सरकारले भूमि उपयोग विहिन रहने अवस्थाको अन्त्य गर्ने घोषणा गरेको छ । उपयोग विहिन सार्वजनिक सरकारी जमिनमा फलफूल र अन्य विरुवा रोप्ने र संरक्षण गर्ने कार्यक्रम अभियानका रुपमा लागू गरिनेछ । निजि बाँझो जग्गामा खेती गर्न अभिप्रेरित गरिनेछ । त्यस्तै खेतको आली र बारीका कान्ला समेत उपयोग गरिनेछ ।
