काठमाडौं । नेपाल राष्ट्र बैंकले सबै बैंक तथा वित्तिय संस्थाहरुलाई कोरोना भाइरसका कारण ऋणको सावाँ वा ब्याज नमाग्न र चैत्र मसान्तको ब्याज असार मसान्तसम्म भुक्तानी गर्न पाउने छुट दिने निर्णय गर्यो । साथै अर्थतन्त्रलाई चलायमान बनाउन लकडाउनकै अवधीमा ऋणको ब्याज तिर्नेलाई १० प्रतिशत छुट दिने निर्णय समेत गर्यो ।
केन्द्रीय बैंकले दिएको उक्त निर्देशन धेरै बैंकहरुले पालना गर्न आकाकानी गरेको खुलेको छ । मानवीय संवेदना गुमाउँदै बैंकहरुले छुट दिन आनाकानी गरेको पीडित ऋणीहरुको गुनासो छ । छुट दिने नाममा केही बैंकहरुले चैत्र महिनाका सावाँ ब्याज भुक्तानी गर्नेलाई बैशाख महिनामा छुट दिने भन्दै छुट दिन इन्कार गरेको हो । त्यस्तै केहीले कृषि कर्जामा मात्रै छुट दिने नीति अख्तियार गरेको पाइएको छ । त्यस्तै केहीले ओभरड्राफ्ट कर्जामा छुट नदिने निर्णय गरेको खुलेको छ ।
केन्द्रीय बैंकको निर्देशन अक्षरस पालना गर्नुपर्नेमा थुप्रै बैंकहरुले विभिन्न बाहनामा लकडाउनका बीचमा कर्जाको भुक्तानी गर्नेलाई छुट दिन आनाकानी गरेपछि कोरोना महामारीबाट पीडित भएकाहरुले राहत पाउन सकेनन् । कतिपय बैंकले कर्जामा छुट पनि नदिने र ऋणीको बैंक खातामा रहेको रकम सिष्टमले काट्यो भन्दै आफै तानेर सावाँ ब्याज भुक्तानी गरेको गुनासो समेत उद्योगी व्यवसायीहरुले गरेका छन् ।
यसैबीच, सिद्धार्थ बैंकले ब्याजदर घटाएको छ । कोरोना महामारीका कारण राहत दिन भन्दै सो बैंकले ब्याजदर घटाएको हो । तर, बैंकले बचतको मात्रै ब्याजदर घटाएको हो । ऋणको ब्याजदर भने जेठबाट मात्रै घट्ने जनाएको छ ।
