काठमाडौं । नेपालमा सञ्चालन भइरहेका जीवन बीमा कम्पनीहरुले बीमा पोलिसी नविकरण गर्दा ब्याज छुट दिने भएका छन् । कोरोनाको महामारीमा जनतालाई राहत दिन महामारी अवधीभर बीमा पोलिसी नविकरण गर्दा ब्याज छुट दिने भएका हुन् । यद्यपि सो सम्बन्धमा औपचारिक निर्णय भने हुन बाँकी छ ।
जीवन बीमा कम्पनीहरुको छाता संगठन जीवन बीमक संघको बैठक आजै बस्दैछ । संघले सर्वसम्मतिबाट बीमा शुल्क भुक्तानीमा विलम्वमा लाग्ने शुल्क छुट दिने निर्णय गर्ने संघका एक पदाधिकारीले बताए ।
जीवन बीमक संघका अध्यक्ष शिवनाथ पाण्डेले भने बीमा शुल्कमा लाग्ने ब्याज मिनाहा दिने सम्बन्धमा सबै कम्पनीहरुको कुरा सुनेर औपचारिक रुपमा निर्णय हुने बताए । उनले यस अवधीमा बीमा कम्पनीहरु खुल्ला हुने बताए । अध्यक्ष पाण्डेले ‘बीमा कम्पनीहरु त खोल्नैपर्छ । जीवन बीमा पोलिसी धितोमा ऋण प्रवाह गर्नुपर्ने हुन्छ, बीमा दावी भुक्तानी गर्न पनि कार्यालय त खोल्नै पर्छ ।’
आजको बैठकमा कर्मचारीहरुलाई कसरी विदा दिने, विदा व्यवस्थापन कसरी गर्ने भन्ने सम्बन्धमा समेत छलफल हुनेछ । जीवन बीमा कम्पनीहरुले छुट्टा छुट्टै निर्णय गर्नुभन्दा सामूहिक निर्णय गरेर बीमा कम्पनी सञ्चालन गर्ने पक्षमा संघ रहेको छ ।
