काठमाडौं । अमेरिकी बहुराष्ट्रिय बैंक स्ट्याण्डर्ड चार्टर्ड बैंकको समेत लगानी रहेको नेपालस्थित स्टाडर्ड चार्टर्ड बैंकले चालु आवको दोस्रो त्रैमाससम्मा १ अर्ब २२ करोड ६९ लाख रुपैयाँ नाफा कमाएको छ ।
गत आवको तुलनामा यस आवमा ७.१२ प्रतिशत नाफा वृद्धि गर्दै सो सफलता हात पार्न सफल भएको हो । बैंकले गत आर्थिक वर्षको दोस्रो त्रैमासमा १ अर्ब १४ करोड ५३ लाख रुपैयाँ खुद नाफा गरेको थियो ।
मंगलबार बैंकले छ महिनाको वित्तीय विवरण सार्वजनिक गर्दै चालु आवको पुस मसान्तसम्ममा वितरणयोग्य नाफा भने १ अर्ब ३ करोड ७ लाख रुपैयाँ आर्जन गर्न सफल भएको देखिएको छ ।
समीक्षा अवधीमा बैंकले निक्षेप संकलनमा ६.३५ प्रतिशत र कर्जा प्रवाहमा २.२६ प्रतिशतको वृद्धि गर्न सफल भएको छ । छ महिनामा बैंकले ८० अर्ब ५४ करोड ७ लाख रुपैयाँ निक्षेप संकल गरी ५४ अर्ब २९ करोड ३० लाख रुपैयाँ कर्जा लगानी गरेको वित्तिीय विवरणमा उल्लेख छ ।
वित्तीय विवरण अनुसार बैंकको जगेडा कोषमा पाँच अर्ब ९ करोड ९० लाख रुपैयाँ र सेयरधनी कोषमा १ अर्ब २३ करोड २२ लाख रुपैयाँ सञ्चित छ । समीक्षा अवधीमा बैंकको प्रतिसेयर आम्दानी ३० रुपैयाँ ६३ पैसा, प्रतिसेयर नेटवर्थ १७९ रुपैयाँ ३ पैसा र मूल्य आम्दानी अनुपात १९.१३ गुणा कायम भएको छ । पुस मसान्तसम्ममा बैंकको खराब कर्जा ०.१७ प्रतिशत रहेको छ ।
